2015թ. ՀՀ Սահմանադրական փոփոխությունների հանրաքվեի օրը հանձնաժողովականների աշխատանքը խոչընդոտելու եւ նրանցից մեկի հանդեպ բռնություն գործադրելու՝ հարվածելու համար մեղադրվող քաղաքացիական ակտիվիստ Հակոբ Դեխնավիի գործով հերթական դատական նիստն այսօր չկայացավ` դատարանում հոսանքազրկման հետեւանքով առաջացած տեխնիկական խնդիրների պատճառով:
Այսօր Դեխնավիի շահերի պաշտպան, փաստաբան Դավիթ Գյուրջյանը պետք է ընթերցեր պաշտպանական ճառը, Դեխնավին էլ՝ վերջին խոսքն ասելու իրավունքից օգտվեր, սակայն նիստը հետաձգվեց մինչեւ օգոստոս: Aravot.am-ի հետ զրույցում Դավիթ Գյուրջյանը նշեց, որ պաշտպանական ճառով դատարանից արդարացման դատավճիռ է պահանջելու:
«Ներկայացնելու եմ դատաքննության ընթացքում հետազոտված ապացույցները եւ վկաների ցուցմունքները: Գտնում ենք, որ Դեխնավիի մեղավորությունն ապացուցված չէ, նման փաստեր չկան»,-համոզմունք հայտնեց Դավիթ Գյուրջյանը: Հիշեցնենք, որ Հակոբ Դեխնավին մեղադրանքը չի ընդունում եւ պնդում է, որ իրականում ՀՀԿ անդամ-հանձնաժողովականն է իրեն հարվածել:
Լուիզա ՍՈՒՔԻԱՍՅԱՆ
