«Չեմ կարծում, որ առաջիկայում հայ-թուրքական հարաբերություններում մեծ փոփոխություններ կլինեն: Էրդողանը կոշտ ադրբեջանամետ դիրքորոշում ունի, որը հայկական կողմին խուսանավելու առիթ չի տալիս»,-«Մեդիա կենտրոնում» լրագրողների հետ հանդիպմանն այսօր անդրադառնալով Թուրքիայում օրերս կայացած նախագահական ընտրություններին եւ Ռեջեփ Թայիփ Էրդողանի՝ նախագահի պաշտոնում վերընտրվելուն, ասաց քաղաքագետ Ստեփան Գրիգորյանը: Նա կարծում է, որ հասարակական-փորձագիտական մակարդակում Հայաստանը Թուրքիայի հետ պետք է շարունակի աշխատել:
Թուրքագետ Վարուժան Գեղամյանը կարծիք հայտնեց. «Ճիշտ է, ՀՀ-ի նոր իշխանության պայմաններում բոլոր ոլորտներում «ռեստարտ» է արվում, բայց արտաքին հարաբերություններում ակտիվ աշխատանքը պետք է շարունակվի. «Իշխանության համար կարեւոր հարց է արտաքին քաղաքական խնդիրները պահել օրակարգում»:
Քաղաքագետ Երվանդ Բոզոյանի բնորոշմամբ էլ՝ Թուրքիան այժմ ավելի վտանգավոր ու ռազմատենչ է դարձել. «Էրդողանն ավելի կոշտ կգործի կովկասյան տարածաշրջանում: Դատարկ են խոսքերը, թե հայ-թուրքական հարաբերություններում ինչ-որ բան կբարելավվի: ՀՀ-ի ներսից ուժեղացումը, հզոր տնտեսություն ու բանակ ստեղծելը թուրքական վերնախավին կստիպեն հաշվի նստել մեր հետ: Բացի այդ, թուրքական վերնախավը փոխզիջման կգնա միայն մեր կողմից ակտիվության պարագայում, եթե ՀՀ իշխանությունները տարանջատեն հայ-թուրքական եւ հայ-ադրբեջանական հարաբերությունները»:
Լուիզա ՍՈՒՔԻԱՍՅԱՆ
