Երեկ վարչապետին կից Ընտրական օրենսգրքի բարեփոխումների հանձնաժողովի նիստում որոշում է ընդունվել նախագծում ամրագրել 100 տոկոս համամասնական ընտրակարգը եւ կուսակցությունների եւ դաշինքների անցողիկ շեմը 1 տոկոսով իջեցնել:
Այսօր Aravot.am-ը «Ելք» խմբակցության պատգամավոր Արամ Սարգսյանից հետաքրքրվեց, թե ի՞նչ կարծիք ունի այս որոշումների հետ կապված, կողմնակի՞ց է դրան եւ ի՞նչ կտա դա: Արամ Սարգսյանը պատասխանեց, որ այդ հարցը շատ երկար է քննարկվել. «Ես այդ հարցում նաեւ որոշակի բանավեճ ունեմ իմ կուսակից Արտակ Զեյնալյանի հետ եւ չէի ուզի իմ ու Արտակի բանավեճը տեղափոխել լրատվական դաշտ, դրա համար այս փուլում ձեռնպահ կմնամ: Բայց որ այդ հարցերը պիտի քննարկվեին՝ դա օրինաչափ է: Մոտեցումների առումով այլ մոտեցումներ չկան, այդ խնդիրներին մասնակցում է նաեւ ՀՀԿ-ն, գիտեք, որ ինքն էլ իր ուրույն տեսակետն ունի, բայց իրենք երրորդ ուրիշ տարբերակ չեն առաջարկել: Ընտրությունը պիտի կատարվի այս տարբերակների մեջ: Ես համարում եմ, որ արդար ընտրությունների համար քաղաքական կամք է պետք»:
Ըստ Արամ Սարգսյանի, խորհրդարանական կառավարման համակարգում ռեյտինգային ընտրակարգը խանգարում էր կուսակցությունների կայանալուն ու արդար ընտրություններին: Նա հիշեցրեց, որ ինքը առհասարակ խորհրդարանական կառավարման կողմնակից չի եղել, գտնում է, որ այդ համակարգը դեռ մեզ բազմաթիվ փորձությունների առաջ է կանգնեցնելու եւ դրա համար Սահմանադրական հանրաքվեի ժամանակ կատեգորիկ դեմ էր: Ըստ Արամ Սարգսյանի, պետք է գտնվի միջին տարբերակ:
Մասնավորապես ինչի՞ն է դեմ, անցողիկ շեմն իջեցնելո՞ւն, տարաձայնությունն ինչի՞ շուրջ է՝ Արամ Սարգսյանը պատասխանեց. «Շեմ իջեցնելուն դեմ չեմ բացարձակ, այդ խնդիրը չեմ էլ նայում գերկարեւոր ընտրությունների արդարության կոնտեքստում: Մենք այսօր ուզում ենք լուծել արդար ընտրությունների ենթատեքստը ու այստեղ ամենակարեւորը շեմը չի: Շեմն իջեցնելը համարում եմ տրամաբանական, մեր երկրի համար օբյեկտիվ, գտնում եմ, որ ԱԺ-ում պիտի ներկայացված լինեն ոչ թե 3-4 ուժեր, այլ մի քիչ ավելի շատ՝ համապատասխան իրավիճակներում կոալիցիաներ կազմելու եւ դաշինքներ ձեւավորելու, հնարավորություն ավելի շատ քվե հավաքած ուժին տալու համար»:
Հարցին՝ ի՞նչն է ամենաէականը՝ Արամ Սարգսյանը պատասխանեց. «Ամենաէականը բաց քվեաթերթիկով, թե փակ քվեաթերթիկով մասնակցության խնդիրն է, իմ կարծիքով, որովհետեւ բաց քվեաթերթիկի պարագայում հեշտանում է կուսակցությունների խնդիրը, առաջին 3 համարներից հետո մարդիկ մրցակցում են իրենք իրար մեջ եւ յուրաքանչյուրն աշխատում է իր կուսակցությանն ավելի շատ քվե բերել: Թե ես որ մոդելի կողմնակիցն եմ, չեմ ասի, որ իմ ու Արտակի բանավեճը չտեղափոխեմ հանրային դաշտ, բայց ես ասում եմ, որ 3-ից հետո լուծվում է այդ խնդիրը, որ կուսակցության անդամներն իրենք են իրենց տեղն ամրագրում կուսակցությունում: Բնականաբար, առաջին երեքն էլ կարող էին այդ մրցակցությանը մասնակցել, բայց քանի որ առաջին երեքում պիտի երեւա ով է վարչապետի թեկնածուն, այսինքն, դու պիտի ասես, որ իմ առաջին համարը մեր հաղթանակի դեպքում վարչապետն է լինելու, այս առումով առաջին երեքի մրցակցայինում լինելը այնքան էլ լուրջ ու ճիշտ չի նայվի: Երեքից հետո կարող է բաց քվեաթերթիկ լինել: Դրան դեմ խոսողներն ասում են, որ այդ ցուցակում էլի տեղ կգրավեն տեղական հեղինակություն ունեցող տղերքը, ովքեր քաղաքական չեն, բայց հանրային ընկալման մեջ հեղինակություն են՝ ունեցած միջոցների, ազդեցության, պաշտոնի առումով եւ այն քաղաքական մտածող մարդիկ, ովքեր լուրջ քաղաքական տրամաբանություն ունեն, քաղաքական ասելիք ու խոսք ունեն, շատ ավելի մաքուր են, ու այդպիսիք ՀՀԿ-ում էլ կան, որոնց հետ զրուցելուց լիքը լավ բաներ ես վերցնում, կմնան խաղից դուրս: Ես կարծում եմ, որ այս մոդելը, որ հեղինակություններ չլինեն, շատ ավելի ձեռնտու է ընդդիմությանը, ՀՀԿ-ն այսօր ընդդիմություն է դառնում»:
Հարցին՝ ՀՀԿ-ի շանսերն ինչպե՞ս եք գնահատում, 4 տոկոս անցողիկ շեմը կհաղթահարի՞՝ Արամ Սարգսյանը պատասխանեց, որ ՀՀԿ-ին թերագնահատել պետք չի:
Մանրամասները՝ տեսանյութում:
Հռիփսիմե ՋԵԲԵՋՅԱՆ
