«Քանի որ ՀՀ-ում նոր իշխանություն է, հնարավորություն է ստեղծվում՝ վերականգնելու եւ սկսելու բանակցային գործընթացը, որը 2012թ.-ից փաստացի գոյություն չունի: Այստեղ Ադրբեջանն անելիք ունի՝ ոչ թե շարունակել ռազմական հռետորաբանությունը եւ լարել մթնոլորտը տարածաշրջանում, այլ օգտագործել այն փաստը, որ ՀՀ իշխանությունները լեգիտիմ են»,-«Մեդիա կենտրոնում» լրագրողների հետ հանդիպմանն այսօր անդրադառնալով Արցախյան հակամարտության կարգավորման շուրջ հնարավոր զարգացումներին, ասաց քաղաքագետ Ստեփան Գրիգորյանը:
«Սերժ Սարգսյանը չէր կարողանա լուծել Արցախի հարցը, քանի որ լեգիտիմ չէր: Ոչ ոք նրան չէր սատարում, իսկ Նիկոլ Փաշինյանի դեպքում վստահությունն ու լեգիտիմությունը բարձր է: Ադրբեջանը պետք է խելոքանա եւ օգտագործի այդ փաստը»,-համոզմունք հայտնեց Ստեփան Գրիգորյանը:
Նա կոչ է անում չմոռանալ, որ ՀՀ երրորդ նախագահ Սերժ Սարգսյանը եւ ՀՀ վարչապետ Նիկոլ Փաշինյանը տարբեր կերպարներ են. «Ապրիլյան դեպքերի ժամանակ ո՞վ կանխեց պատժիչ գործողությունները՝ Սերժ Սարգսյանը, քանի որ Ռուսաստանը դա հրահանգեց: Հիմա Ալիեւը պետք է իմանա, որ եթե դիմեց հարվածի, հակահարված կստանա: Համոզված եմ, որ հիմա մեր բանակի կողմից պատժիչ գործողություններ կկատարվեն, որովհետեւ ոչ-ոք չի կարող Նիկոլ Փաշինյանին ինչ-որ բան հրամայել. նա լեգիտիմ է»:
Ինչ վերաբերում է ներկայումս բանակում կոռուպցիայի դեմ պայքարին, քաղաքագետի խոսքով. «Դա նշանակում է, որ բանակի մարտունակությունն ուժեղանում է. նոր գաղափարներ կլինեն, գումարներն ավելի արդյունավետ կծախսվեն»:
Լուիզա ՍՈՒՔԻԱՍՅԱՆ
