Հունիսի 27-ին կայացած ԱՀ ԱԺ հերթական լիագումար նիստի ժամանակ ՀՅԴ Արցախի ԿԿ ներկայացուցիչ, ԱԺ պատգամավոր Դավիթ Իշխանյանը ներկայացրել է ՀՅԴ Արցախի ԿԿ-ի հայտարարությունը:
«Անցած մեկ ամսվա ընթացքում ՀՅԴ Արցախի կառույցը օգտագործելով տարբեր ձևաչափեր ու հարթակներ իր մտահոգություններն ու տեսակետներն է հնչեցրել Արցախում ստեղծված ներքաղաքական իրավիճակի ու անելիքների մասին: Այդ ամենը մամուլով և ուղղակի հանդիպումներով փոխանցվել է թե՛ հանրությանը, թե՛ իշխանություններին և թե՛ քաղաքական ուժերին:
Սկսված ներքաղաքական գործընթացը Արցախում անցնելու է մի քանի հանգրվանով: Մենք դեռևս հաղթահարում ենք այս զարգացող գործընթացների նախնական փուլը:
Վերլուծելով դեպքերի զարգացումներն ու իրադարձությունները, գնահատելով հնչեցված քաղաքական պահանջներն ու քայլերը, ծանոթ լինելով հանրության տարբեր շերտերի մոտ առկա դժգոհություններին ու ակնկալիքներին, կարելի է կատարել որոշակի ամփոփումներ և եզրակացություններ՝
Երկրում ընթացող բարեփոխումները պետք է ունենան համակարգային բնույթ: Ողջունելի է ԱՀ նախագահի կողմից հայտարարված բարեփոխումների իրականացման մեկնարկը, այն պետք է ունենա հարկ եղած թափն ու վճռական ընթացքը և արտացոլի հասարակության լայն շերտերի ցանկությունը ու հուսադրող մթնոլորտ ապահովի երկրի բնականոն զարգացման համար,
Անհրաժեշտ է առավել թափանցիկ դառնա պետական մարմինների գործունեությունն ու իշխանության կատարած աշխատանքների ծանուցումը հասարակությանը՝ ապահովելով լրատվական դաշտի ազատ և թափանցիկ գործունեություն,
Բարեփոխումները չպետք է առիթ դառնան մինչ այս պետական պատասխանատու պաշտոններ ստանձնած անձանց թերացումների և բացթողումների անտեսմանը և ըստ այդմ պատասխանատվությունից խուսափմանը,
Բարեփոխումները չպետք է սահմանափակվեն միայն կադրային նշանակումներով և տեղաշարժերով, որոնք չեն կարող ամբողջականացնել հանրության սպասելիքները:
Քաղաքական անցնցում զարգացումները երաշխիք են անվտանգության ապահովման ու պահպանման համար:
Ստեղծված իրավիճակում Հայ Հեղափոխական Դաշնակցությունը, որպես խորհրդարանական ուժ իր պարտականությունն է համարում, ներկայացնել համապատասխան տեսակետներ ու առաջարկներ և գործնական հողի վրա դնելով բարեփոխումների ընթացքը՝ կրել քաղաքական պատասխանատվություն: Անշուշտ քաղաքական պատասխանատվության չափը կախված կլինի բարեփոխումների ընթացքում մեր մասնակցության և դերակատարության աստիճանից:
Համոզված ենք, որ Հայ Հեղափոխական Դաշնակցությունը, որպես համահայկական կառույց, ունի այն ներուժն ու ունակությունը, որ երկրի կառավարման համակարգում կրի պատասխանատվություն, որն անկասկած կնպաստի Արցախի պետականության ամրապնդմանն ու միջազգային հեղինակության բարձրացմանը:
ՀՅԴ Արցախի Կենտրոնական կոմիտե
