«Սասնա ծռերի» գործով հերթական դատական նիստում այսօր պաշտպանական կողմից ներկայացվեց ամբաստանյալներից Վարդգես Գեւորգյանի (լուսանկարում) խափանման միջոց կալանքը փոխելու, ասել է թե՝ նրան ազատ արձակելու միջնորդություն՝ պատգամավորական երաշխավորագրի հիմքով: Այդ նպատակով դատարան ներկայացան ԱԺ «Ծառուկյան» խմբակցության պատգամավորներ Վահե Էնֆիաջյանը եւ Գեւորգ Պետրոսյանը, ստորագրեցին երաշխավորագիրը՝ հավաստելով, որ Գեւորգյանը, գտնվելով ազատության մեջ, պատշաճ կներկայանա դատաքննությանը:
Երբ կատակասիրությամբ հայտնի դատավոր Արտուշ Գաբրիելյանն իր առաջ կանգնած պատգամավորներին բացատրում էր նրանց իրավունքներն ու պարտականությունները, նրան մի ճանճ էր խանգարում: Գաբրիելյանն ընթերցելն ընդհատեց ու բարձր ասելով՝ «իյա՜», ձեռքով «քշեց» ճանճին: Նիստերի դահլիճում ներկա դատավարության կողմերը, եւ ապակե պատնեշից այս կողմ գտնվող քաղաքացիները ծիծաղեցին:
Ազատ կարձակվի՞ հակատանկային դասակի նախկին հրամանատար Վարդգես Գեւորգյանը, թե ոչ, պարզ կլինի մեկ ժամից: Նրա մեղադրանքը տարբերվում է մյուս ամբաստանյալների մեղադրանքներից: Ըստ դրա՝ նա լքել է մարտական հենակետը, հափշտակել դանակ եւ նռնակ ու մտադրվել է միանալ ՊՊԾ գունդը գրավածներին: Իսկ նրա տանը խուզարկությամբ «մարիխուանա» է հայտնաբերվել: Վերջերս նրա կալանքը փոխելու միջնորդություն էր ներկայացվել առանց պատգամավորական երաշխավորագրի եւ մերժվել:
Լուիզա ՍՈՒՔԻԱՍՅԱՆ
