Այսօր կառավարության առաջ ցուցարարների նոր խումբ էր հայտնվել: Նիկոլ Փաշինյանին բողոքելու էին եկել մի խումբ կանայք՝ երեխաները գրկներին, ասելով, որ ճիշտ է, իրենք համարվում են երիտասարդ ընտանիք, բայց տարիքային շեմով չեն համապատասխանում երիտասարդների համար պետության առաջարկած ծրագրերին: Նրանց խոսքերով՝ այսօր բազմաթիվ իրենց պես ընտանիքներ ապրում են վարձով եւ չեն կարողանում բնակարան ձեռք բերել՝ ոչ ամուսինների տարիքային հանրագումարն է համապատասխանում, ոչ էլ աշխատավարձի չափը, որպեսզի կարողանան հիփոթեքային վարկեր վերցնեն եւ բնակարան գնեն:
Լիլիթ Ոսկանյանի խոսքով՝ իր ընտանիքն արդեն 11 տարի է ապրում է վարձով եւ այդ տարիների ընթացքում արդեն մոտ 16 հազար դոլար բնակարանի վարձ է վճարել, մինչդեռ կարող էր այդ գումարով եւ բնակարանի տեր լինել, եւ կանխավճարն ու հիփոթեքի տոկոսները վճարել:
Նա ասում է, որ պարտաճանաչ վարձակալ է եւ իր պես շատ ընտանիքներ հազարավոր դոլարներ են վճարում վարձով բնակարանի համար եւ այդպես էլ տան տեր չեն դառնում: Այդ ամենի հետեւանքով այսօր շատ ընտանիքներ բռնում են գաղթի ճանապարհը: Նրանք վարչապետին խնդրում էին վերանայել կանխավճարի չափը, հիփոթեքի տոկոսները եւ պայմանները, տարիքային շեմը վերանայել, որպեսզի իրենք էլ կարողանան օգտվել այդ ծրագրերից:
Լուսինե ԲՈՒԴԱՂՅԱՆ
