13-րդ դարում կառուցված Սաղմոսավանքը ամենաայցելված մշակութային հուշարձաններից է, հայկական ճարտարապետության գեղեցկագույն նմուշներից: Այն աշխարհում միակ վանքն է, որը սաղմոսների անունով է կոչվում, պատճառն էլ այն է, որ հրաշալի ակուստիկա ունի: Վերջին շրջանում շատերն են ձգտում պսակվել Սաղմոսավանքում, որովհետեւ այն գեղատեսիլ վայրում է գտնվում՝ Քասախ գետի բարձրադիր հատվածում: Այստեղ է կայացել նաեւ հայկական շախմատի առաջատար Լեւոն Արոնյանի եւ Արիանա Քաոլիի պսակադրությունը: Մեր այցելության պահին էլ ռուսաստանաբնակ հայեր էին ամուսնանում՝ մեր օրերում կայացող հարսանիքների բոլոր կանոններով: Այցելուներից ոմանք նույնիսկ իրենց մասին հիշատակություն են թողել, բնականաբար ոչ սեպագիր: Անգամ ստորագրել են վանքի հարեւանությամբ գտնվող քարերի վրա ու մակագրել՝ սիրով:
Լուսանկարը՝
ԳՈՀԱՐ ՀԱԿՈԲՅԱՆԻ
«Առավոտ»
27.06.2018
