ՊՊԾ գնդի գրավման գործով հերթական դատական նիստում այսօր դատավարության կողմերը շարունակում են դիտել գնդի տարածքում իրավապահների նկարահանումների տեսանյութերը: Որպես ապացույցներ քրեական գործին են կցված նաեւ որոշակի ժամանակահատվածով գնդի տարածքում գտնված լրատվամիջոցների տեսանյութերը: Դրանցում «Սասնա ծռեր» խմբի անդամները ներկայացնում են իրենց պահանջներն ու պատճառները, թե ինչու որոշեցին զենքով հարցեր լուծել:
Ապա դիտվեց նաեւ խմբի անդամներից Վարուժան Ավետիսյանի հարցազրույցը, որում լրագրողը հետաքրքրվում է՝ «բեմահարթակի աստղն այժմ պատգամավոր Նիկոլ Փաշինյանն է, դուք ի՞նչ կարծիքի եք այդ մասին»:
Վարուժան Ավետիսյանը պատասխանում է. «Վարկաբեկված եւ գործակալ-լիդերներ ունեցող ներկայիս կուսակցություններով հնարավոր չէ ստեղծել նոր պետություն եւ հասնել մեր պահանջին՝ Սերժ Սարգսյանի հրաժարականին: Մենք կարծում ենք, որ պետք է վերջ տալ կուսակցական գործընթացներին: Եթե պարոն Փաշինյանն ուզում է այս նեխած համակարգի մեջ ինքը դառնալ պետության ղեկավար, սա կործանարար ճանապարհ է, մենք այդքան ժամանակ չունենք»:
Ապա դիտվեցին նաեւ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանի, ՀԽ համակարգող Գարեգին Չուգասզյանի եւ քաղաքացիական ակտիվիստ Գեւորգ Սաֆարյանի՝ 2015թ. մամուլի ասուլիսների տեսագրությունները:
Հիշեցնենք, որ «Սասնա ծռեր» խմբի անդամներից Վարուժան Ավետիսյանին եւ Պավել Մանուկյանին վերագրվում է 2015թ. Հայոց ցեղասպանության զոհերի հիշատակի հարյուրամյա տարելիցին ընդառաջ զանգվածային անկարգություններ նախապատրաստելու մեղադրանք:
Լուիզա ՍՈՒՔԻԱՍՅԱՆ
