Այսօր Մարդու իրավունքների պաշտպան Արման Թաթոյանը ներկայացրեց 2017-ի իր տարեկան զեկույցը: Նա խոսեց հեղափոխության օրերին նաեւ լրագրողների նկատմամբ բռնությունների մասին:
Հարցին՝ Երեւանի ոստիկանապետ է նշանակվել մի անձ, որի հետ կապված լրագրողի նկատմամբ բռնության գործով դիմել են ՄԻԵԴ, ինչպե՞ս եք վերաբերվում այդ հանգամանքին՝ Թաթոյանը պատասխանեց, որ տեղյակ է այդ հրապարակումներին, հասարակական արձագանքին, նաեւ ոստիկանության արձագանքին. «Այդ գործը կարճվել է հանցադեպի բացակայության հիմքով, դա նշանակում է, որ այն անձը, ում նկատմամբ գործը կարճվում է այդ հիմքով, համարվում է արդարացված: Ինձ դուր չեկավ ոստիկանության պատասխանը, ես դա անընդունելի եմ համարում: Ագրեսիվություն ունեցող պատասխանի մեջ ոստիկանությունը պետք է ընդգծեր լրագրողի դերի կարեւորությունը, հակառակն աներ»:
Ըստ Թաթոյանի, ոստիկանությունը պետք է ընդգծեր, որ անընդունելի է լրագրողի նկատմամբ բռնությունը, ներողություն խնդրեին ոստիկանության անունից լրագրողից, շատ կարեւոր է ցույց տալ նաեւ վերաբերմունքը. «Դրա համար այդ արձագանքը ինձ ընդհանրապես դուր չեկավ, հույս ունեմ, որ ոստիկանության մեր գործընկերները հետագայում այլ արձագանք կունենան իրենց դիրքորոշումներում»:
Հռիփսիմե ՋԵԲԵՋՅԱՆ
