Քաղաքային տրանսպորտի 82%-ը անմխիթար վիճակում է: Այսօր այս մասին «Բլից ինֆո» մամուլի ակումբում ասաց փոխադրողների միության նախագահ Հրանտ Եղիազարյանը:
Տրանսպորտի նման վիճակի պատճառն այն է, ըստ Եղիազարյանի, որ փոխադրող ընկերությունների ղեկավարներն իրենց հասույթից պարտադիր բաղադրիչները վճարելուց հետո, ասենք՝ հարկեր, ապահովագրություն, երթուղու սպասարկման գումար, իրենց քիչ գումար է մնում մեքենաները նորոգելու համար:
Վերջին 3 տարիներին, ինչպես ասաց Եղիազարյանը, 6 երթուղի է փակվել, մի քանի օր առաջ էլ 2 երթուղի է փակվել, իսկ նոր երթուղի չի բացվել:
«Որոշ երթուղիներ անշուհաթաբեր են, փակվում են, մնացածը մի կերպ աշխատում են»,-ասաց Եղիազարյանը:
Մանրամասն՝ տեսանյութում
Որպեսզի խնդիրը լուծվի, Եղիազարյանն առաջարկում է կառավարությանը դոտացիա տալ փոխադրողներին՝ մինչեւ տրանսպորտային նոր ցանցը ներդրվի:
Մանրամասն՝ տեսանյութում
Փոխադրողների միության նախագահը հիշեցրեց, երբ 2013 թվականին իսպանական աուդիտորական ընկերությունը ուսումնասիրեց սահմանեց հետեւյալ սակագները. «Իսպանական անկախ փորձագետներն ուսումնասիրեցին գործող երթուղային ցանցի աշխատանքները եւ հաշվարկեցին, թե ինչպես պետք է աշխատեն փոխադրողները, պարզվեց՝ ներքաղաքային միկրոավտոբուսների համար պետք էր 152 դրամ, գազով ավտոբուսների համար՝ 202 դրամ, իսկ դիզվառելիքով ավտոբուսների համար՝ 250 դրամ: Այս թվերը ֆիքսված են, քաղաքապետարանն ունի, սակայն ոչ մի բան չարեց»:
Եղիազարյանի պնդմամբ՝ ներկայիս տրանսպորտային շարժակազմի եւ երթուղային ցանցի առկայության դեպքում կան լուրջ խնդիրներ, որ մինչեւ տարեվերջ չձգեն դրանք:
Ինչ վերաբերում է քաղաքային իշխանությունների՝ մեկ միասնական տրանսպորտային ցանցի ծրագրին, ապա Եղիազարյանն ասաց՝ դա իրականություն կարող է դառնալ լավագույն դեպքում դեկտեմբերին, այն էլ այն դեպքում, եթե քաղաքային իշխանությունները չփոխվեն. «Կգան նոր մարդիկ, նոր մոտեցումներ եւ խնդիրը լրիվ ուրիշ ձեւ կարող է լուծեն, ասեն՝ նախկինը՝ հեչ, հիմա նոր մոտեցումներ ունենք»:
Նոր տրանսպորտային ցանցի մասին էլ Եղիազարյանն ասաց, որ նախագծում որոշ թերություններ կան. օրինակ ցանցում ներառել են մի փողոց, որտեղով մարդիկ չեն երթեւեկում, այնտեղ ավտոկայանատեղի է: «Մեր փողոցները կվերաձեւավորեն, կտրվեն առավելություններ հասարակական տրանսպորտին»,-ասաց Եղիազարյանը:
Մանրամասն՝ տեսանյութում
Եղիազարյանն ասաց, որ փոխադրողները նամակով դիմել են վարչապետին` խնդրելով ուշադրություն դարձնել երթուղային տրանսպորտին:
Նելլի ԲԱԲԱՅԱՆ
