Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստի ընթացքում ԵԽԽՎ պատվիրակների և ԵԽ գլխավոր քարտուղար Թորբյորն Յագլանդի միջև բանավեճը շարունակվում է: Ինչպես արդեն տեղեկացրել ենք, երեկ ԵԽԽՎ պատվիրակներ Վլադիմիր Արիևն ու Գեորգի Կանդելակին հարցրին՝ ինչո՞ւ ժամանակին պարոն Յագլանդը, երբ իրեն տեղեկություններ են տրամադրվել ադրբեջանական կոռուպցիոն սկանդալների մասին, ընթացք չի տրվել:
Ի պատասխան պարոն Յագլանդը վրդովվեց, թե քաղաքական թատրոն սարքել պետք չէ, այլ ուղղակի պետք է վստահել այն անկախ մարմնին, որը ստեղծվել է ԵԽԽՎ պատվիրակների կողմից և այժմ զբաղվում է կոռուպցիոն սկանդալների հետաքննությամբ:
ԵԽ գլխավոր քարտուղարի հետ հարցուպատասխանից հետո պարոն Կանդելակին ելույթ ունեցավ և Թորբյորն Յագլանդի մասնակցությամբ որոշ փաստեր ներկայացրեց: Նա հայտարարեց. «Այսօր պարոն Յագլանդը վրդովվեց իմ և պարոն Արիևի հարցերից, որոնք վերաբերում էին հակակոռուպցիոն մարմնի հետաքննության մի կոնկրետ դրվագի: Դրվագը բավականին կարևոր է: Փաստաթղթերը վկայում են այն մասին, որ 2011-ին այն ժամանակվա Ադրբեջանի դեսպանը Եվրախորհրդում հանդիպել է պարոն Յագլանդին և նրա անձնական գրասենյակի ղեկավարին ու ներկայացրել մանրամասներ կոռուպցիոն գործընթացների վերաբերյալ, որոնք ընթանում էին Եվրոպայի խորհրդում: Մինչդեռ պարոն Յագլանդը պնդում է, որ այդ հանդիպմանն ինքը դեսպանի հետ խոսել է նրա երկրում կոռուպցիայի մասին, այլ ոչ թե ԵԽ-ի ներսում»:
Այնուհետև հիշեցնելով, որ մեկ օր առաջ ԵԽ-ում հրավիրված ասուլիսի ընթացքում 2006-2012թթ. Եվրախորհրդում Ադրբեջանի դեսպան Արիֆ Մամադովի ներկայացրած փաստերը, պարոն Կանդելակին նշեց. «Երեկ պարոն Մամադովն այստեղ ներկայացրեց խնդրի այլ տեսանկյուն և բավականին մանրամասն կերպով ներկայացրեց իր և պարոն Յագլանդի խոսակցությունները: Ինձ համար դրանք համոզիչ էին և մերժեցին պարոն Յագլանդի ներկայացրած իրավիճակը: Դրանք վկայում են այն մասին, որ պարոն Յագլանդը վեհաժողովի առաջ ստել է: ԵԽ գլխավոր քարտուղարը պնդում է իր տարբերակը: Լավ, բայց 13.27 Կանոնը, որը վերաբերում է խարդախությանը եւ կոռուպցիայի իրազեկմանն ու կանխմանը, 2011-ին ստորագրվել է հենց պարոն Յագլանդի կողմից: Համաձայն այդ փաստաթղթի 4-րդ հոդվածի՝ քարտուղարության անդամները պարտավորված են հայտնել ցանկացած կասկածի մասին, որը վերաբերում է կոռուպցիային և խարդախությանը, ԵԽ ղեկավարություն: Այդ մասին հայտնելը ոչ թե ընտրության հարց է, այլ պարտավորություն: Ես հարցրի պարոն Յագլանդին՝ ինչո՞ւ այն տեղեկությունները, որ իրեն և պարոն Բերգերին հայտնել են, նա չի փոխանցել ԵԽ ներքին վերահսկողության ղեկավարություն: Այսօր մի պարզ հարց է մեզ հետաքրքրում՝ արդյոք նրանք կվկայե՞ն այդ հանդիպման մասին: Այս հարցը պահանջում է այո կամ ոչ պատասխան: Հետևաբար, եթե պարոն Յագլանդը խուսափում է պատասխանել այս հարցին, դա նշանակում է նա խուսափում է ընդունել, որ նման հանդիպումներ եղել են: Այս խնդիրը հետագայում ևս ուշադրություն է պահանջում, և գլխավոր քարտուղարը պետք է բացատրություն տա»:
Տաթև ՀԱՐՈՒԹՅՈՒՆՅԱՆ
