«Չեմ կարծում, որ Ռեջեփ Թայիփ Էրդողանի՝ Թուրքիայի նախագահի պաշտոնում վերընտրվելը դրական կազդի հայ-թուրքական հարաբերությունների վրա, առավել եւս, եթե ընտրությունների արդյունքներին ուշադրություն դարձնենք»,- «Առավոտ»-ի հետ զրույցում անդրադառնալով Թուրքիայում հունիսի 24-ին կայացած նախագահական եւ միաժամանակ խորհրդարանական ընտրություններին՝ ասաց թուրքագետ Տարոն Հովհաննիսյանը: Նա ընդգծեց. «Արդարություն եւ զարգացում» կուսակցությունը, որը ղեկավարում է Էրդողանը, չկարողացավ ինքնուրույն բացարձակ մեծամասնություն ապահովել: Դա տեղի ունեցավ «Ազգայնական շարժում» կուսակցության հետ դաշինքով: Իսկ «Ազգայնական շարժում»-ը Թուրքիայի ամենաազգայնամոլական ընտրազանգվածներին միավորող կուսակցությունն է, որը ցանկացած որոշում ընդունելիս ստիպված է լինելու հաշվի նստել հասարակության այդ հատվածների հետ, որոնք Թուրքիայում փոքր թիվ չեն: Բացի այդ, Էրդողանին եւս հարում են ազգայնամոլական-իսլամադավան զանգվածներ. բնականաբար, նման նախագահը հայամետ քաղաքականություն չի վարելու: Չեմ կարծում, թե այդ առումով դրական տեղաշարժեր կլինեն՝ ոչ Հայաստանի հետ հարաբերությունների, ոչ էլ Թուրքիայի հայկական համայնքի առնչությամբ»:
«Առավոտ»
26.06.2018
