Դատավոր Աննա Դանիբեկյանի նախագահությամբ քիչ առաջ «Սարի թաղի գործով» ամբաստանյալներ Արման Ադամյանը, Ժորա Ավետիսյանը եւ Հրաչյա Բոյաջյանն ազատ արձակվեցին կալանքից: Նրանց հանդեպ որպես խափանման միջոց ընտրվեց ստորագրությամբ երկրից չհեռանալը: Դատարան եկած հարազատներն ասում էին, որ երիտասարդների ազատ արձակումն իշխանափոխության արդյունք է: «Ապրի Փաշինյանը», «վերջապես», «արդարությունը հաստատվեց»,-ուրախությամբ նշում էին նրանք:
Դատարանի շենքի առաջ սարիթաղցիների ազատ արձակման առթիվ շամպայն բացեցին: Հատկանշական է, որ մինչեւ «Իմ քայլը» ժողովրդական շարժումը սարիթաղցիներին կալանքից ազատվելու միջնորդություն քանիցս ներկայացվել էր, սակայն՝ մերժվել:
Սարիթաղցիները մեղադրվում են ՊՊԾ գնդի գրավումից հետո, մասնավորապես՝ հուլիսի 19-ին, Սարի թաղում միջադեպի ժամանակ ոստիկանների հանդեպ բռնություն գործադրելու մեջ: Հիշեցնենք, որ մի քանի օր շարունակ Սարի թաղում ջուր եւ գազ չի եղել, դեպի Խորենացի փողոց՝ ՊՊԾ գնդի կողմ տանող ճանապարհն էլ փակ է եղել (տարածքը գրավված էր «Սասնա ծռեր» զինված խմբի կողմից), ինչի պատճառով բնակիչները դուրս էին եկել փողոց բողոքելու. նրանց եւ ոստիկանների միջեւ բախում էր տեղի ունեցել: Վերջերս կալանքից ազատվել էին չորս սարիթաղցիներ:
https://www.facebook.com/aravot.am/videos/2047478545270650/
Լուիզա ՍՈՒՔԻԱՍՅԱՆ
