«Եթե ներկայումս ընտրություններից հետո միայն 3 կուսակցություններ կարող էին հետընտրական կոալիցիա կազմել եւ այդ որոշումը կայացնել 6-օրյա ժամկետում, ապա նոր Ընտրական օրենսգիրքը պետք է ավելացնի օրերի քանակը եւ վերացնի քաղաքական ուժերի թվի սահմանափակումը»,-«Հոդված 3» մամուլի ակումբում այսօր խոսելով առաջիկայում նախատեսվելիք արտահերթ խորհրդարանական ընտրություններին ընդառաջ Ընտրական օրենսգրքում փոփոխություններ կատարելու մասին, ասաց «Թրանսփարենսի ինթերնեյշնլ» հակակոռուպցիոն կենտրոնի իրավախորհրդատու Հերիքնազ Տիգրանյանը:
«Մենք կարծում ենք, որ ամենավատ ընտրական օրենսգրքով էլ կարելի է թափանցիկ ընտրություններ անել, եթե քաղաքական կամք դրսեւորվի ընտրակաշառքների դեպքերը բացահայտելու գործում»,-հավելեց նա:
«Հայ հեղափոխական դաշնակցություն» կուսակցության անդամ Լուսինե Հովհաննիսյանն էլ ասաց՝ կուսակցությունը դեմ է վարկանիշային ընտրակարգին, որը, սակայն, կարող է այլ ձեւաչափով կիրառվել. «Մենք դեմ չենք լինի, օրինակ, համապետական վարկանիշային ընտրակարգի կիրառմանը»:
ՀՔԱ Վանաձորի գրասենյակի իրավախորհրդատու Վարդինե Գրիգորյանը չհամաձայնեց՝ ասելով, որ վարկանիշային ընտրակարգն առհասարակ պետք է բացառել. «Եթե համապետական վարկանիշային ընտրակարգ լինի, թեկնածուներն իրենց մեջ բաժանումներ են անելու ու մարդկանց ուղղորդեն, թե որ մարզում, օրինակ, իրենց որ թեկնածուին պետք է ընտրել»:
Լուիզա ՍՈՒՔԻԱՍՅԱՆ
