«Զորամասերում իշխանություններն ունեն բացառիկ հնարավորություններ. նրանք զինվորներին կպարտադրեն քվեարկել իրենց համար ձեռնտու ուժի օգտին»,-«Հոդված 3» մամուլի ակումբում այսօր խոսելով առաջիկայում նախատեսվելիք արտահերթ խորհրդարանական ընտրություններին ընդառաջ Ընտրական օրենսգրքում փոփոխություններ կատարելու մասին, որպես խնդիր մատնանշեց ԱԺ «Ծառուկյան» խմբակցության պատգամավոր Սերգեյ Բագրատյանը:
Նա պնդում է, որ ընտրությունների օրը սպաները չպետք զինվորների հետ ընտրատեղամասեր գան, որպեսզի ճնշում չգործադրեն նրանց ընտրական իրավունքի վրա:
Ապա պատգամավորը համոզմունք հայտնեց, որ ընտրությունները մշտադիտարկողների թվի սահմանափակման արգելքը պետք է վերացվի, իսկ ընտրախախտումների համար սահմանվող պատիժները՝ խստացվեն. «Ընտրակեղծարարությունը պետք է բացառվի: Յուրաքանչյուրը պետք է հասկանա, որ չպետք է փորձի կեղծիքների դիմել»:
Ինչ վերաբերում է վարկանիշային ընտրակարգին, պատգամավորը շեշտեց. «Մենք 100% համամասնականի կողմնակից ենք, մենք բացառում ենք վարկանիշային կարգը»:
Լուիզա ՍՈՒՔԻԱՍՅԱՆ
