Դատավոր Աննա Դանիբեկյանի նախագահությամբ այսօր «Սարի թաղի գործով» հերթական դատական նիստն էր: Ամբաստանյալի աթոռին են Արման Ադամյանը, Ժորա Ավետիսյանը եւ Հրաչյա Բոյաջյանը: Վերջինիս շահերի պաշտպան Արայիկ Զալյանը նախորդ նիստում ներկայացրել էր Բոյաջյանի խափանման միջոց կալանքը փոխելու միջնորդություն: Դա ենթադրում է, որ եթե դատարանն ընդունի 1.000.000 ՀՀ դրամի չափով գրավի որոշում, ապա Բոյաջյանը կալանքից կազատվի:
Այսօր այդ միջնորդության քննարկումն ավարտվեց, ինչից հետո պաշտպանական կողմից կալանքից ազատման միջնորդություններ ներկայացվեցին նաեւ Արման Ադամյանի եւ Ժորա Ավետիսյանի համար:
Դատավոր Աննա Դանիբեկյանը հեռացավ խորհրդակցական սենյակ՝ որոշում կայացնելու, որը կհրապարակվի աշխատանքային օրվա ավարտին:
Ի դեպ, այսօրվա նիստը մեկ ժամ ուշացմամբ սկսվեց, քանի որ ոստիկանության ուղեկցող գումարտակն ամբաստանյալներին սահմանված ժամին չէր բերել դատարան՝ առանց այդ մասին բացատրական գրության:
Սարիթացիները մեղադրվում են ՊՊԾ գնդի գրավումից հետո, մասնավորապես՝ հուլիսի 19-ին, Սարի թաղում միջադեպի ժամանակ ոստիկանների հանդեպ բռնություն գործադրելու մեջ: Հիշեցնենք, որ մի քանի օր շարունակ Սարի թաղում ջուր եւ գազ չի եղել, դեպի Խորենացի փողոց՝ ՊՊԾ գնդի կողմ տանող ճանապարհն էլ փակ է եղել (տարածքը գրավված էր «Սասնա ծռեր» զինված խմբի կողմից), ինչի պատճառով բնակիչները դուրս էին եկել փողոց բողոքելու. նրանց եւ ոստիկանների միջեւ բախում էր տեղի ունեցել: Վերջերս կալանքից ազատվել էին չորս սարիթաղցիներ:
Լուիզա ՍՈՒՔԻԱՍՅԱՆ
