ԵԿՄ նախագահ Մանվել Գրիգորյանի կատարած անօրինականությունների, անարդար ու անպատիժ վարքագծի մասին գրեթե բոլորը գիտեին՝ սկսած ԵԿՄ վերնախավից, վերջացրած անտեղյակ ձևացող մի շարք բարձրաստիճան պաշտոնյաներով: Համաձայն եմ՝ գուցե չէին պատկերացնում, որ իրեն հաղթած ու ամենակարող գեներալ հռչակած Գրիգորյանը կարող էր այդքան ցած ընկնել, բայց որ տարիներ շարունակ նրա անունը կապված է եղել բազմաթիվ զազրելի դեպքերի հետ, միանշանակ լսել էին ու գիտեին բոլորը: Հիմա, ընդամենը, Մանվել Գրիգորյանի ու իր մերձավորների գործողություններին տրվեց իրավական գնահատական՝ ողջ հետևանքներով:
Այս պահին գլխավոր հարցն, իհարկե, վերաբերում է ԵԿՄ-ի հետագա գործառույթներին ու ճակատագրին: Ի սկզբանե, այդ կառույցն ուներ այլ նշանակություն և կոչված էր մեր երկրում իրականացնելու լրիվ այլ գործունեություն՝ իր ղեկավարներով հանդերձ, բնականաբար: Սակայն տարիների ընթացքում այն, ինչ տեղի ունեցավ Մանվել Գրիգորյանի ձեռամբ և ԵԿՄ վերնախավի լռությամբ ու համաձայնությամբ, մեղմ ասած, անընդունելի է:
Այսօր համացանցում շատ է քննարկվում՝ արդյոք օրվա իշխանություններին և հասարակությանն անհրաժեշտ է նման որակներով, իմաստազրկված մի կառույց, և արդյոք ԵԿՄ-ն պետք է շարունակի իր գոյությունը նույն ձևաչափով՝ հիմա էլ այլ նախկին ու ներկա հարստացած ԵԿՄ-ականների գլխավորությամբ:
Թեմայի մանրամասները՝ տեսանյութում:
Սուրեն Սարգսյան
