Վահան Շիրխանյանը՝ Մանվել Գրիգորյանի «աթոռի» ու Վազգեն Սարգսյանի խստության մասին

Նորքի «զինված խմբի գործով» ամբաստանյալ, Պաշտպանության նախկին փոխնախարար Վահան Շիրխանյանը, որն այսօր ազատ արձակվեց կալանքից, լրագրողների հետ զրույցում ասաց՝ իր ազատումը պայմանավորում է ՀՀ-ում տեղի ունեցած իշխանափոխությամբ: Ինչ վերաբերում է Նիկոլ Փաշինյանի ղեկավարած նոր կառավարությանը, նա նշեց. «Գերազանց կարծիք ունեմ, հուսամ՝ ամեն ինչ այդպես կշարունակվի»:

Անդրադառնալով գեներալ Մանվել Գրիգորյանի ձերբակալությանը՝ նա հայտարարեց. «Մարդու համար ամենածանր փորձությունն աթոռն է ու փողը: Մանվելը չդիմացավ ոչ աթոռի, ոչ փողի փորձությանը եւ ընկավ այդ վիճակի մեջ»:

Խոսելով վերջերս Պաշտպանության նախարարությունում բացահայտված չարաշահումների մասին, Վահան Շիրխանյանն ասաց. «ՊՆ-ն դարձել էր շուրջօրյա խանութ՝ վաճառք, օր ու գիշեր…բնական է, որ դա վերեւից պետք է իջներ զորամասեր: Լավ է, որ դա բացահայտվում է, բայց ցավում եմ, որ այդ ամենը բանակի պատվին է հարվածում»:

Իսկ թե ինչ չարաշահումների է հանդիպել Շիրխանյանն իր պաշտոնավարման ընթացքում, նա վստահեցրեց. «Նման դեպքերը շատ քիչ էին եւ անմիջապես կանխվում էին. Վազգեն Սարգսյանը շատ դաժան էր նման դեպքերի հանդեպ»:

Լուիզա ՍՈՒՔԻԱՍՅԱՆ