Քիչ առաջ դատավոր Արմեն Բեկթաշյանը որոշեց բավարարել Նորքի «զինված խմբի գործով» մեղադրյալներից Վահան Շիրխանյանի խափանման միջոց կալանքը փոխելու միջնորդությունը: Իսկ դա նշանակում է, որ Պաշտպանության նախկին փոխնախարար Վահան Շիրխանյանը կալանքից ազատ է արձակվում եւ այսուհետեւ դատաքննությանը կներկայանա ոչ կալանավորի կարգավիճակում:
Նա մեղադրվում է հանցավոր համագործակցության կազմում ընդգրկվելու եւ որոշակի դերակատարում ստանձնելու համար: Նրա պաշտպան Հայկ Ալումյանը մինչեւ «Իմ քայլը» ժողովրդական շարժումը քանիցս ներկայացրել էր նույն միջնորդությունը եւ մերժում ստացել: Ըստ նրա՝ Շիրխանյանի ծանր առողջական խնդիրները համատեղելի չէին կալանքի հետ:
Ըստ գործի նյութերի՝ մեղադրյալ Արթուր Վարդանյանը, որը ենթադրյալ զինված խմբի ղեկավարն է, ձեւավորել է մոտ 30 անձից բաղկացած հանցավոր խումբ, որը պահել է զենք-զինամթերք՝ մտադրվելով 2015թ. խոցել ՀՀ երրորդ նախագահ Սերժ Սարգսյանի ինքնաթիռը: Այս գործով օրերս միայն երեք մեղադրյալ է կալանքից ազատվել:
Լուիզա ՍՈՒՔԻԱՍՅԱՆ
