Համաշխարհային բանկը Հայաստանը դասում է աշխարհի 60 ամենաաղետավտանգ երկրների շարքում: Այս մասին այսօր խորհրդարանում կազմակերպված «Աղետների դիմակայունության ամրապնդումը եւ զարգացումը» թեմայով խորհրդարանական լսումների ժամանակ ասաց ՀՀ արտակարգ իրավիճակների փոխնախարար Արա Նազարյանը:
«Աշխարհում հայտնի բնական վտանգներից ՀՀ-ին բնորոշ են շուրջ 110-ը, ինչը բացատրվում է նրանով, որ ՀՀ-ն բարձր ռելիեֆ ունեցող երկիր է՝ կտրուկ լեռնաշղթաներով, դաշտավայրերով, մասնատված բարձրության մեծ տատանումներով, իսկ բարձրությունների տատանումները մոտ 3500 մետր է»,-մանրամասնեց փոխնախարարը` հավելելով, որ Հայաստանի տարածքն ամբողջությամբ ենթակա է ուժեղ երկրաշարժերի. «Երկրի 4.1 տոկոսը ենթակա է սողանցքների, 30 տոկոսը՝ սելաֆների եւ հեղեղումների, 0.5 տոկոսը՝ փլուզումների, քարաթափումների, 12 տոկոսը՝ ցրտահարությունների, 15 տոկոսը՝ երաշտի եւ 17 տոկոսը՝ կարկտահարման»:
ՀՀ-ն թեեւ հանդիսանում է սակավանտառ երկիր, բայց մեր տարածքին հատուկ են նաեւ անտառային հրդեհները: Այս ամենին ավելանում են նաեւ պոչամբարների ու տեխնածին աղետների հետ կապված խնդիրները:
Նելլի ԳՐԻԳՈՐՅԱՆ
