«Աղետների եւ ռիսկերի ՀՀ նոր ռազմավարության տրամաբանությունն աղետների, ռիսկերի կառավարմանն արձագանքող ռեակտիվ ձեւաչափից ավելի պրոակտիվ օրակարգի տեղափոխելն է՝ հիմնական շեշտը դնելով առկա եւ հնարավոր ռիսկերի բացահայտման, կանխարգելման վրա»,- այսօր խորհրդարանում Պաշտպանության եւ անվտանգության հարցերի մշտական հանձնաժողովի նախաձեռնած «Աղետների դիմակայունության ամրապնդումը եւ զարգացումը» թեմայով խորհրդարանական լսումների ժամանակ ասաց ՀՀ արտակարգ իրավիճակների նախարար Հրաչյա Ռոստոմյանը: Նման մոտեցումը, սակայն, ըստ նախարարի, պահանջում է կարողությունների զարգացման գործընթաց, հատկապես հաշվի առնելով օրեցօր ավելացող մարտահրավերները, որոնք առնչվում են ոչ միայն ԱԻՆ-ի գործունեությանը: Համենայնդեպս, իր ղեկավարած գերատեսչության տեսլականը Հայաստանը կայուն երկիր դարձնելն է, քանի որ կայուն երկիր ունենալը զգալիորեն կակտիվացնի բնակչության, համայնքների ու պետության` տարբեր աղետներին դիմակայելու կարողությունները՝ նվազագույնի հասցնելով մարդկանց կյանքին, առողջությանն ու ունեցվածքին, բնությանը, երկրի տնտեսությանը սպառնացող կորուստները:
Դրա համար, ըստ նախարարի, անհրաժեշտ է բարձրացնել հանրային գիտակցության մակարդակը` մարդկային գործունեության հետեւանքով ու բնական երեւույթներով առաջացնող աղետների ու ռիսկերի նկատմամբ:
Նա արձանագրեց, որ վերջին տարիներին ՀՀ-ում աղետների եւ ռիսկերի կառավարման ոլորտում արձանագրված առաջընթացն ու նվաճումները տեսանելի ու ճանաչելի են, հատկապես, տարածաշրջանային մակարդակներում:
Սա չի խանգարում, որ աղետների եւ ռիսկերի կառավարման հետ կապված ԱԻՆ-ը նոր ծրագրեր առաջ տանի:
Նելլի ԳՐԻԳՈՐՅԱՆ
