Փակ հաստատություններում խոշտանգումների վերջին աղմկոտ դեպքը ՀՀ մարդու իրավունքների պաշտպանի գրասենյակի աշխատակիցները գրանցել են հոգեբուժարանում: Այդ մասին այսօր ասաց ՄԻՊ գրասենյակի մարդու իրավունքների պաշտպանության բաժնի ղեկավար Արտյոմ Սեդրակյանը`փակ հաստատություններում մարդկային խոշտանգումների թեմայով հանրային քննարկման ժամանակ: Նա ցավ հայտնեց, որ 21-րդ դարում դեռ կան նման փաստեր եւ դրանք քննարկելու անհրաժեշտություն էլ կա: Բայց ասաց`իրենք հետեւում են այդ դեպքերին, ավելին, ձգտում են, որ առավելապես փակ հաստատություններում խոշտանգումների որեւէ դեպք իրենց ուշադրությունից դուրս չմնա:
Հոգեբուժարանում գրանցված վերջին խոշտանգման դեպքը ՄԻՊ գրասենյակի ներկայացուցիչը շատ չմանրամասնեց: Միայն ասաց`«խնդիրն էական է», դեպքն էլ առնչվում է բժշկի հետ:
Որ մարդու իրավունքների խախտումների դեմ պայքարի խնդիրը շարունակում են գերակա առաջնահերթություն լինել իրենց համար, հայտարարեց նաեւ քննարկմանը մասնակցող ՀՀ արդարադատության փոխնախարար Սուրեն Քրմոյանը: Փոխնախարարի գնահատմամբ, փակ հաստատություններում խոշտանգումների մասով, 20-10 տարի տիրող իրավիճակի համեմատ այսօր բավական առաջընթաց կա: Թվարկում է առաջընթացի պատճառները եւ նախարարության դերն ու մասնակցությունն այդ առաջընթացին`օրենսդրական դաշտի փոփոխություն, միջազգային չափանիշներին համապատասխանեցում: Բայց, փոխնախարարի պնդմամբ, իրենք ավելի մեծ նշանակություն են տալիս գործնական քայլերին: Նկատում է նաեւ, որ խոշտանգումների եւ նվաստացումների համար պատժամիջոցներն են խստացվել, իբրեւ կանխարգելիչ միջոց:
Գործող օրենսդրությամբ, նման հանցագործությունների համար դատապարտված անձինք չեն կարող օգտվել պատժի մեղմացման կամ վաղաժամկետ ազատման դրույթներից:
Բանախոսներն այս գործում կարեւոր են համարում հասարակության մասնակցությունը`միաժամանակ նշելով, որ այդ դերը գերագնահատել չի կարելի:
Սուրեն Քրմոյանը կարծում է, որ մեր հասարակությունն իրավիճակի ավելի մեծ փոփոխության կարիք ունի եւ կոչ է անում`միասին արմատախիլ անել այս բացասական երեւույթը մեր կյանքից:
Նելլի ԳՐԻԳՈՐՅԱՆ
