Թուրքիայի նախագահ Ռեջեբ Թայիփ Էրդողանը այսօր տեղի ունեցած նախագահական ընտրություններում քվեաթերթիկների 70 տոկոսի հաշվարկի արդյունքում հավաքում է ձայների 55.1 տոկոսը, հաղորդում է «Անադոլուն»: Էրդողանի գլխավոր մրցակիցը ընդդիմադիր Ժողովրդահանրապետական կուսակցության թեկնածու Մուհարեմ Ինջեն է, որը հավաքում է ձայների 29.4 տոկոսը:
Եթե Էրդողանը վերջնական արդյունքում հավաքի ձայների կեսից ավելին, ապա ընտրությունների երկրորդ փուլ չի լինի:
Նախագահական ընտրություններին Էրդողանից և Ինջեից բացի մասնակցում էին Սելահեդդին Դեմիրթաշը (քրդամետ Ժողովուրդների ժողովրդավարական կուսակցություն), Մերալ Աքշենարը (Լավ կուսակցություն), Թեմելյա Քարամոլլաօղլուն (Երջանկության կուսակցություն) և Դողու Փերինչեքը («Հայրենիք» կուսակցություն):
Այս պահի դրությամբ Աքշենարն հավաքել է 7.5%, Դեմիրթաշը՝ 6.9%, Քարամոլլաօղուն՝ 0.9% և Փերինչեքը՝ 0.2%:
Թուրքիայում նախագահականին զուգահեռ ընթանում են նաև խորհրդարանական ընտրություններ, որոնցում դարձյալ ձայների մեծամասնությունը՝ 44.9 տոկոս, Էրդողանի Արդարություն և զարգացում կուսակցությանն է: Հիմնական ընդդիմադիր Ժողովրդահանրապետական կուսակցությունը այս պահին ունի 21.1 , ազգայնական Ազգային շարժման կուսակցությունը՝ 11.7, Լավ կուսակցությունը՝ 9.7, իսկ քրդամետ Ժողովուրդների ժողովրդավարական կուսակցությունը՝ 9.9 տոկոս ձայն:
Հիշեցնենք, այսօր տեղի ժամանակով 17:00-ին փակվել են բոլոր ընտրատեղամասերը: Ընտրություններին մասնակցել է ձայնի իրավունք ունեցողների 87 տոկոսը:
Պատրաստեց Վիկտորյա Անդրեասյանը
