Օսիպյանի կողմից Երեւանի ոստիկանապետ է նշանակվել մի մարդ, ով վիդեոյում պատկերված օրը հարվածել է դեմքիս, հետո տեղի ունեցածի հետ կապված հարուցված քրեական գործով կեղծ ցուցմունքներ է տվել: Տարիներ շարունակ Արմեն Խաչատրյանի, Վահե Գրիգորյանի եւ այլ փաստաբանների հետ միասին հետեւողականորեն պայքարել ենք այդ օրը տեղի ունեցածի բոլոր մեղավորներին, նաեւ այս մարդուն պատասխանատվության կանչելու համար, որովհետեւ Հայաստանում ի վերջո պետք ա գա մի օր, որ լրագրողի նկատմամբ բռնություն կիրառողը իրական պատասխանատվության ենթարկվի: Մի բան էր, երբ նախորդ իշխանությունների ժամանակ տեսանք, թե ոնց էս մարդը ոստիկանության կենտրոնի բաժնի պետից դարձավ Երեւանի փոխոստիկանապետ, բայց այլ բան է, երբ նրա կարիերայի աճը շարունակվում ա նոր իշխանության օրոք:
ՀՀ-ում ապօրինությունների դեմ սկսված շատ կարեւոր պայքարի պայմաններում առավել եւս նման դեպքերն ու «հերոսները» չպետք ա անտեսվեն:
Անի ԳԵՎՈՐԳՅԱՆ
լրագրող
Հ. Գ. ՀՀ ոստիկանությունն այս նշանակման վերաբերյալ տարածել է պարզաբանում, որում մասնավորապես ասված է. «Հիշատակված քրեական գործը դեռևս 2014 թվականին ՀՀ հատուկ քննչական ծառայությունում ՀՀ քրեական օրենսգրքի 164-րդ հոդվածի 2-րդ մասի (պաշտոնատար անձն իր պաշտոնեական դիրքն օգտագործելով՝ լրագրողի մասնագիտական օրինական գործունեությանը խոչընդոտելը) և 309-րդ հոդվածի 2-րդ մասի (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով) հատկանիշներով հարուցվել է հանցափաստի, այսինքն՝ անձի հաղորդման հիման վրա, որի շրջանակներում ՀՀ ոստիկանության Երևան քաղաքի վարչության նորանշանակ պետ, ոստիկանության գնդապետ Արտակ Պողոսյանին անգամ մեղադրանք չի առաջադրվել: Նշված քրեական գործը կարճվել է հանցակազմի բացակայության հիմքով:
ՀՀ ոստիկանությունը կոչ է անում հարգել պետական բարձրաստիճան պաշտոնյայի անմեղության կանխավարկածը, իրավական հարթությունից դուրս՝ անհարկի մեկնաբանություններով և հուզական ձևակերպումով կասկածի տակ չդնել արդեն իսկ պատշաճ իրավական գնահատականի արժանացած քրեական վարույթի արդյունքները և նախաքննության մարմնի օբյեկտիվությունը»:
