ՀՀ ԱԺ «Ծառուկյան դաշինք» խմբակցության պատգամավոր Սերգեյ Բագրատյանն առաջարկում է՝ Ընտրական օրենսգրքի (ԸՕ) շուրջ քննարկումները երկու տարբեր ձևաչափերով լինեին՝ խորհրդարանական և արտախորհրդարանական, որպեսզի ավելի մոբիլ աշխատանք իրականացվեր:
«Պոստ սկրիպտում» մամուլի ակումբում լրագրողների հետ հանդիպմանը պարոն Բագրատյանը հիշեցրեց՝ երեկ ԱԺ-ում տեղի ունեցավ ԸՕ-ի փոփոխությունների հանձնաժողովի նիստ, որը ձևակերպվեց որպես նախանիստ, որոշում չընդունվեց, առաջին նիստը կհրավիրվի հուլիսի 4-ին, որին կմասնակցեն 4 խմբակցություններից 3-ական պատգամավորներ:
Անդրադառնալով իրենց առաջարկած փոփոխություններին՝ պատգամավորը նշեց. «Առաջին փոփոխությունն այն է, որ համամասնական ընտրական համակարգն ամբողջությամբ անցնի հարյուր տոկոսի, այլևս բացառենք վարկանիշային ընտրակարգը: 2017-ի ապրիլի 2-ի ընտրություններին բավականին խնդիրներ առաջացան այն իմաստով, որ հիմնականում բաժանվեց փող, ընտրակաշառք, կիրառվեցին վարչական լծակներ: Բացառելով այդ համակարգը՝ կնվազեցնենք ռիսկերը: Երկրորդ թեզն է կրկնաքվեարկությունների բացառումը: Ցավոք, այս դեպքում մենք ունենք բավականին բարդություններ ժամանակի իմաստով, որ հնարավոր է չստացվի մինչև արտահերթ ընտրությունները: Առաջարկում ենք այլընտրանքային տարբերակ՝ մատների թանաքի միջոցով բացառել կրկնաքվեարկությունները: Կարևոր ենք համարում ակտիվ և պասիվ ընտրական ցուցակները: Ակտիվ են այն ընտրացուցակները, որ կոնկրետ մասնակիցների թիվն արձանագրվում է ՀՀ-ում գտնվելու իմաստով, պասիվ է այն ընտրազանգվածը, որն ունենալով ՀՀ-ում գրանցում, գտնվում է արտերկրում: Երկու ցուցակները համադրելով՝ կարող ենք բացառել բացակա ընտրողների փոխարեն քվեարկության կազմակերպումը»:
Սերգեյ Բագրատյանը հավաստիացրեց՝ փոփոխությունների հիմնական նպատակն է արդար և թափանցիկ ընտրությունների անցկացումը. «Եթե կարողանանք իրականացնել կարևորագույն այս խնդիրը, մենք կունենանք այլևս նոր որակի երկիր և վստահ կարող ենք առաջընթաց արձանագրել: Այս պահին ներքաղաքական իրականությունն այնպիսին է, որ թեև գործող կառավարությունն ունի համաժողովրդական քվե, բայց դեռ դասական իմաստով կառավարություն և դասական իմաստով գործող ինստիտուտներ չունենք, քանի որ պետք է ընտրել ԱԺ և ձևավորել կառավարություն: Այն կառավարման համակարգը, որ այժմ կա, անցումային է: Եթե հնարավոր լինի մինչ այդ նաև իշխանության երեք թևերը՝ դատական, գործադիր և օրենսդիրը, տարանջատել, դա կլինի արդյունավետ»:
Հարցին՝ ե՞րբ հնարավոր կլինի անցկացնել արտահերթ խորհրդարանական ընտրություններ, պարոն Բագրատյանը պատասխանեց. «Վարչապետը հայտարարեց նոյեմբեր ամիս, որից հետո հաշվարկները ցույց տվեցին, որ կարող է մինչև մեկ տարի տևել: Հետո էլ լրատվական արտահոսք տեղի ունեցավ, իբր սեպտեմբերին պիտի կայանան: Մեր տրամաբանության և վերլուծության արդյունքում ես կարծում եմ, որ մարտ-ապրիլին հնարավոր է հասցնենք պատրաստ նոր ԸՕ ունենալ և Վենետիկի հանձնաժողովով փորձաքննության անցած իրավիճակ ունենալ և անցկացնել արտահերթ խորհրդարանական ընտրություններ: ԵՄ գործընկերները կարևորում են, որ փոփոխություններից հետո վեց ամսից մինչև մեկ տարի ժամանակ է պետք, որ նոր ընտրակարգին ադապտացվեն ուժերը: Եթե սեպտեմբերին փոփոխությունները լինեն և Վենետիկի հանձնաժողով ուղարկվեն, դեռ ժամանակ է պետք, որ միջազգային կառույցների կողմից ընդունելի լինի, և խնդիրներ չունենանք»:
Իրենց կողմից հնչած այն հայտարարությունները, թե «Ծառուկյան դաշինք»-ն ի վիճակի է 50 տոկոսով անցնել խորհրդարան, պարոն Բագրատյանը մեկնաբանեց՝ առաջնորդվել ենք դասական իմաստով, ոչ թե հաշվի առել տվյալ պահի քաղաքական իրավիճակը:Ուստի ճաշակի խնդիր է մոտենալ այդ հայտարարությանը դրական կամ բացասական:
ՀՀԿ-ի ներկայիս դիրքորոշումը ԸՕ-ի հետ կապված պարոն Բագրատյանը դրական համարեց, քանի որ սկսել են մասնակցել քննարկումներին և վարկանիշային ընտրակարգը ևս քննարկման առարկա են դարձնում:
Տաթև ՀԱՐՈՒԹՅՈՒՆՅԱՆ
