ԱԺ «Ծառուկյան» խմբակցության պատգամավորներ Նաիրա Զոհրաբյանի եւ Սերգեյ Բագրատյանի ստորագրած երաշխավորագրի հիմքով այսօր գուցե ազատ արձակվեն «Սասնա ծռեր» խմբի անդամներից Թաթուլ Թամրազյանը եւ Գեւորգ Իրիցյանը:
Նրանց շահերի պաշտպաններն այսօր դատավոր Արշակ Վարդանյանին ներկայացրին փաստաթղթերը, համաձայն որոնց՝ պատգամավորները երաշխավորում են ազատության մեջ գտնվելու ժամանակ ամբաստանյալների պատշաճ վարքագիծը եւ ներկայանալը դատական նիստերին:
Պաշտպաններից Արայիկ Պապիկյանը հայտարարեց՝ եթե կարիք լինի, պատգամավորները կներկայանան դատարան:
Կփոխի,՞ արդյոք, դատարանը նշյալ ամբաստանյալների խափանման միջոցը, պարզ կլինի ժամեր անց: Միջնորդության քննարկման համար դատարանը դեռ խորհրդակցական սենյակ չի հեռացել: Դատախազ Արամ Արամյանն էլ միջնորդության դեմ չառարկեց:
Հիշեցնենք, որ Թամրազյանը, Իրիցյանը եւ խմբի մյուս անդամները մեղադրվում են 2016թ. ՀՀ ոստիկանության ՊՊԾ գունդը գրավելու՝ ապօրինի զենք պահելու, պատանդառություն կատարելու, հափշտակության համար: Նրանցից Արմեն Բիլյանին եւ Սմբատ Բարսեղյանին երեք ոստիկանի սպանության մեղադրանք է առաջադրված:
Վերջին շրջանում խմբի անդամների մի մասի կալանքը փոխվել է պատգամավորական երաշխավորագրերի հիմքով, եւ նրանք ազատության մեջ են:
Լուիզա ՍՈՒՔԻԱՍՅԱՆ
