Հունիսի 15-ից 24-ը մայրաքաղաք Երևանում անցկացվում է արդյունաբերական դիզայնի ցուցահանդես: Տասնօրյա միջոցառումը, որին աջակցում է ԵՄ-ի կողմից ֆինանսավորվող «Աջակցություն ՓՄՁ զարգացմանը Հայաստանում» (SMEDA) ծրագիրը, ուղղված է ուսումնասիրելու ժամանակակից դիզայնի և լուծումների նորարարական ու շարունակական գրավչությունը:
Ցուցահանդեսը համախմբում է հայաստանյան առաջատար դիզայներներին և ճարտարապետներին, ինչպես նաև միջազգային մասնագետներին` երկրում արդյունաբերական դիզայնի զարգացման համար ակտիվ հարթակ ստեղծելու և ստեղծագործական մտքերի ու գործարար և արդյունաբերական ոլորտների միջև համագործակցությունն ամրապնդելու նպատակով:
Միջոցառման ընթացքում ներկայացված են 18 անհատ դիզայներների և դիզայներական թիմերի աշխատանքները, որոնք զբաղվում են արտադրությամբ և արդյունաբերական դիզայնով: Բացի այդ, ցուցադրված է մոտ 30 դիզայներական աշխատանք՝ դիզայներների անհատական պատմությունների ուղեկցությամբ:
ԵՄ-ի «Աջակցություն ՓՄՁ զարգացմանը Հայաստանում» ծրագիրն աջակցում է Հայաստանում գործարար և ներդրումային միջավայրի բարելավմանը՝ փոքր և միջին ձեռնարկատիրությունների (ՓՄՁ) համար: Որպես «ԵՄ-ն բիզնեսի համար» (EU4Business) նախաձեռնության մաս՝ այն նաև նպատակ ունի ամրապնդել մասնավոր հատվածը, աջակցել ՓՄՁ-ների համակարգման մեխանիզմներին և հաստատել կապեր հետազոտական հաստատությունների ու մասնավոր հատվածի միջև, ինչպես նաև ապահովել ֆինանսների հասանելիություն ՓՄՁ-ների համար:
EU NEIGHBOURS east
