Երեւանի ընդհանուր իրավասության դատարանում այսօր շարունակվում է 2016 թվականի նոյեմբերին Նորք-Մարաշում ձերբակալված զինված խմբի գործով դատավարությունը: Պաշտպաններն այսօր միջնորդություններ ներկայացրեցին այս գործով արդեն 2,5 տարի կալանքի տակ գտնվող Վլադիմիր Առաքելյանի, Խաչիկ Ավետիսյանի եւ Հարություն Սարիբեկյանի խափանման միջոցները գրավի դիմաց փոխելու վերաբերյալ: Նրանց համար անձնական երաշխավորություններ են ներկայացրել նաեւ «Մեծն Տիգրան» եւ «Հատուկ գունդ» ազատամարտիկների միությունները:
Այսօր դատական նիստին մասնակցում էին նաեւ ազատամարտիկներ գեներալ Գագիկ Մելքոնյանը, Ռազմիկ Պետրոսյանը եւ այլք:
Դատարանը հեռացավ խորհրդակցական սենյակ, վճիռը կհրապարակվի 15.00-ին:
Գործով կալանավորված պաշտպանության նախկին նախարար Վահան Շիրխանյանի պաշտպան Հայկ Ալումյանն էլ հորդորեց, որ նիստն այսօր շարունակվի, քանզի ինքը ևս միջնորդություն պետք է ներկայացնի իր պաշտպանյալի խափանման միջոցը փոխելու համար: Ասաց`երկու պատգամավորներ անձնական երաշխավորություն են ներկայացրել նրա համար: Թե ովքե՞ր են այդ պատգամավորները, ոչ Վահան Շիրխանյանի պաշտպանը, ոչ էլ հարազատները չհրապարակեցին: Պաշտպանն ասաց`խնդրել եմ մինչեւ իրենց դատարան գալը չհրապարակել իրենց անունները:
Նելլի ԳՐԻԳՈՐՅԱՆ
