«ՀՀ առաջին գեներալներից եմ, որն այդ կոչումը ստացել է Արցախյան պատերազմից անմիջապես հետո: Այդ կոչումը ՀՀ-ում դեռ այն գլխից վարկաբեկված է եղել: Գեներալ դառնալու համար միայն սովորելը ութից տասը տարի է պահանջում, մինչդեռ մեզանում նվերի պես մի բան է դարձել»,-«Սպուտնիկ Արմենիա» մամուլի կենտրոնում լրագրողների հետ հանդիպմանն այսօր անդրադառնալով կարծիքներին, թե գեներալ Մանվել Գրիգորյանին պետք է զրկել այդ կոչումից, ասաց ՀՀ ազգային անվտանգության սահմանապահ զորքերի նախկին հրամանատար, գեներալ-մայոր Լեւոն Ստեփանյանը:
Նրա խոսքով՝ բոլորն են իմացել Մանվել Գրիգորյանի գործունեության մասին. նա ԱԱԾ-ի գործողությունները բացահայտում չի համարում. «Եթե ամեն ինչ ապացուցվի, նա, բնականաբար, բոլոր կոչումներից կզրկվի»:
Դառնալով կոչումների խնդրին՝ նա նշեց, որ ներկայիս որոշ գեներալներ այն ստացել են քաղաքական խաղերի արդյունքում՝ ընտրությունների ժամանակ ձայներ «բերելու» դիմաց. «Գեներալի գիտեմ, որը միջոցառումներ կազմակերպելու համար է այդ կոչումը ստացել: Մի գեներալի տարել էի ռուսական սահմանապահ ջոկատ՝ միջոցառման, բայց անգամ գործընկերոջը ողջունելու ձեւը չգիտեր: Մի գեներալի եմ ճանաչում, որը չգիտի, որ Արարատը ոչ թե ՀՀ-ի, այլ Թուրքիայի տարածքում է»:
Լուիզա ՍՈՒՔԻԱՍՅԱՆ
