Դատավոր Վաչե Մարգարյանի նախագահությամբ այսօր նախկին դատավոր Իշխան Բարսեղյանի գործով հերթական դատական նիստն էր:
Հիշեցնենք, որ Բարսեղյանը մեղադրվում է 2016թ. քաղաքացի Նորիկ Հակոբյանի օգտին դատավճիռ կայացնելու համար նրանից միջնորդի միջոցով հազար ԱՄՆ դոլարի չափով կաշառք պահանջելու եւ ստանալու համար: Փաստաբան Էլզա Զաքարյանը եւս այս գործով մեղադրյալի աթոռին է. նրան մեղադրանք է առաջադրվել այն բանի համար, որ նա կատարել է կաշառքի միջնորդությունը:
Նախկին դատավորի պաշտպանները սկսեցին ընթերցել պաշտպանական ճառը, սակայն այն կիսատ մնաց:
Պաշտպաններից Կարեն Հովհաննիսյանը միայն հասցրեց ընդգծել, որ դատարանն այս գործն օբյեկտիվ չի քննել, որովհետեւ Իշխան Բարսեղյանի պաշտպանների միջնորդությունների մեծ մասը դատավորը մերժել է:
Նիստին ներկա Իշխան Բարսեղյանի եղբոր ինքնազգացողությունը վատացավ, նիստն ընդմիջվեց, եւ շտապօգնություն կանչվեց: Հետո դատավորը որոշեց հետաձգել նիստը:
Հիշեցնենք, որ Իշխան Բարսեղյանին ութ տարվա ազատազրկում է սպասվում, նա իրեն մեղավոր չի ճանաչում եւ առաջիկա նիստերում ինքը եւս հանդես կգա պաշտպանական ճառով:
Լուիզա ՍՈՒՔԻԱՍՅԱՆ
