Եվրոպական հարևանության քաղաքականության և ընդլայնման բանակցությունների հարցերով հանձնակատար Յոհաննես Հանն ու Թվային տնտեսության և հասարակության հարցերով հանձնակատար Մարիա Գաբրիելը հունիսի 21-22-ին կլինեն Բելառուսի մայրաքաղաք Մինսկում՝ Արևելյան գործընկերության 10-րդ ոչ պաշտոնական երկխոսությանը մասնակցելու նպատակով: Նրանք կքննարկեն «20 արդյունք 2020 թվականի համար» փաստաթղթի շրջանակում համագործակցությունը անցյալ տարվա նոյեմբերին կայացած Արևելյան գործընկերության գագաթաժողովից հետո, ինչպես նաև թվային տնտեսության ոլորտում համագործակցության ընդլայնումը Արևելյան գործընկերության վեց երկրների` Հայաստանի, Ադրբեջանի, Բելառուսի, Վրաստանի, Մոլդովայի Հանրապետության և Ուկրաինայի արտաքին գործերի նախարարների ու թվային օրակարգի համար պատասխանատու նախարարների հետ:
Հունիսի 21-ին հանձնակատարները հանդիպում կունենան Բելառուսի Հանրապետության կապի և տեղեկատվության նախարար Սերգեյ Պոպկովի հետ, որպեսզի քննարկեն թվային ոլորտում համագործակցության ուղիները, հատկապես՝ կիբեռանվտանգության կայունության ոլորտում: Այնուհետև հանձնակատարները կմասնակցեն տարածաշրջանում լայնաշերտ կապի խթանման և ռոումինգի սակագների հաղթահարման վերաբերյալ լիագումար նիստին:
Ուրբաթ օրը հանձնակատար Հանը Բելառուսի Հանրապետության արտաքին գործերի նախարար Վլադիմիր Մակեյի հետ միասին կմասնակցի Արևելյան գործընկերության և Արտաքին ներդրումային պլանի գործունեության ներկայիս վիճակի վերաբերյալ լիագումար նիստին: Իր այցի ընթացքում նա նաև երկկողմ հանդիպումներ կունենա Բելառուսի Հանրապետության նախագահ Ալեքսանդր Լուկաշենկոյի, պրն. Մակեյի և պրն. Պոպկովի հետ, ինչպես նաև կհանդիպի տնտեսության և թվային տնտեսության ոլորտներում գործող քաղաքացիական հասարակության ներկայացուցիչների հետ:
