Ինչպես արդեն տեղեկացրել ենք, այսօր խորհրդարանում ընթանում էր «Ընտրական օրենսգրքի» փոփոխությունների աշխատանքային խմբի առաջին հանդիպումը: Այն փակ էր: Հանդիպման ավարտից հետո, լրագրողների հետ զրույցում, աշխատանքային խմբում «Ելք» խմբակցության ներկայացուցիչ Էդմոն Մարուքյանն ասաց, որ հանդիպման ժամանակ հստակեցվել են խմբի աշխատանքային ռեժիմին վերաբերող հարցեր: Բովանդակային քննարկումներ չեն եղել:
Ինչ վերաբերում է «Ելք» -ի առաջարկներին առհասարակ, Էդմոն Մարուքյանն ասաց, որ դրանք ընդգրկված են կառավարության ծրագրում:
Ռեյտինգային ընտրակարգն ընդհանրապես հանելու վերաբերյալ էլ, ըստ Էդմոն Մարուքյանի, մտահոգությունը, որ խորհրդարանում հնարավոր է մարզային ներկայացվածությունը տուժի, ունենանք միայն Երեւանի խորհրդարան, դեռ կա: Հիշեցնենք, այս մտահոգությունը նախկինում էլ կար, անգամ Վենետիկի հանձնաժողովն էր հաստատել այդ մտավախությունը եւ հորդորել`թողնել այն կարգը, որը այժմ գործում է:
«Եթե ընդունվի հարյուր տոկոս համամասնական ընտրակարգ, պետք է կուսակցությունները բեռն իրենց վրա վերցնեն, ցուցակներն այնպես կազմեն, որ մարզերի ներկայացվածություն լինի: Մյուս տարբերակը կարող է համապետական ռեյտինգայինը լինել (դա ՀՅԴ-ի առաջարկն է-Ն. Գ.)»: Գործող օրենսգրքում, այսպես կոչված, տարածքներին կցված ռեյտինգային համակարգն է:
Աշխատանքային խմբի հաջորդ հանդիպումը կլինի հուլիսի 4-ին:
Նելլի ԳՐԻԳՈՐՅԱՆ
