1993-2003թթ.-ին ՀՀ Ազգային անվտանգության սահմանապահ զորքերի նախկին հրամանատար, Հայաստանի պրոֆեսիոնալ սահմանապահ զորքերի հիմնադիր, գեներալ-մայոր Լեւոն Ստեփանյանն այսօր «Սպուտնիկ Արմենիա» մամուլի կենտրոնում լրագրողների հետ հանդիպմանն անդրադառնալով գեներալ Մանվել Գրիգորյանի պահեստներում ԱԱԾ-ի աղմկոտ բացահայտումներին՝ ընդգծեց, որ գեներալի կոչումը ոչ միշտ է արժանի կերպով շնորհվել, որոշներն էլ անարդարության են արժանացել: Որպես օրինակ նա հիշատակեց պաշտպանության նախկին նախարար Վաղարշակ Հարությունյանին, որը Հոկտեմբերի 27-ի ահաբեկչությունից հետո նախագահ Ռոբերտ Քոչարյանի հրամանագրով, ինչպես հայտնի է, զրկվել է գեներալի կոչումից: Ըստ Ստեփանյանի՝ Քոչարյանի որոշումն անարդար էր: Թե ինչ հակասություն է եղել նախկին նախարարի եւ ՀՀ երկրորդ նախագահի միջեւ, Լեւոն Ստեփանյանը պատմեց՝ Քոչարյանը համարել է, որ պաշտպանության նախարարը «հականախագահական գործողություններ» է արել:
«Խնդիրն այն էր, որ բանակը չեր ենթարկվել նախագահին եւ նրա՝ որպես գերագույն գլխավոր հրամանատարի ցուցումներին: Այդ ժամանակ բանակի ղեկավարությունը դուրս էր եկել նախագահի վերահսկողության սահմաններից եւ մտածում էր նախագահին պատասխանատվության ենթարկելու մասին: Բանակը ինքնուրույն գործողությունների է դիմել, զորքեր մտցրել քաղաք: Որոշ ստորաբաժանումներն այդ ժամանակ դուրս էին եկել զորամասերից եւ գալիս էին քաղաք, որ պատժեին նախագահին եւ բոլոր նրանց, ում իրենք մեղադրում էին սպանությունների մեջ»,-տեղեկացրեց Լեւոն Ստեփանյանը: Նա դժվարացավ բնորոշել, թե Վաղարշակ Հարությունյանն է եղել նախագահի դեմ գործողությունների գլխավոր կազմակերպիչը: Լրագրողները հետաքրքրվեցին՝ «այդ դեպքում, ո՞վ»: Լեւոն Ստեփանյանը Մանվել Գրիգորյանի անունը տվեց, ապա ուղղեց խոսքը՝ ասելով, որ Մանվել Գրիգորյանն իր «Երկրապահ»-ով էր դուրս եկել նախագահի դեմ:
«Որքան հիշում եմ՝ ուզում էին կառավարություն ստեղծել ու մարդկանց անվանական ցուցակով մտել էին Ռոբերտ Քոչարյանի մոտ»,-եզրափակեց Լեւոն Ստեփանյանը՝ միայն հավելելով, որ այդ միջադեպերից հետո, սակայն, Մանվել Գրիգորյանն ու Սեյրան Սարոյանը բարձր կոչումներ ստացան:
https://www.facebook.com/aravot.am/videos/2038363476182157/
Լուիզա ՍՈՒՔԻԱՍՅԱՆ
