«Սասնա ծռեր» խմբավորման անդամ Գագիկ Եղիազարյանն ազատ չարձակվեց:
Քիչ առաջ Երեւանի ընդհանուր իրավասության դատարանի Շենգավիթի նստավայրում դատավորը հրապարակեց վճիռը:
Դատարանն արձանագրեց, որ Գագիկ Եղիազարյանին կալանքի տակ պահելու նախկին բոլոր հիմքերն այս պահին էլ կան:
Հիշեցնենք, մի քանի անգամ դատարանը մերժել էր նրա խափանման միջոցը փոխելու միջնորդությունները: Բայց այսօր կա նոր հանգամանք`պատգամավորների անձնական երաշխավորությունը:
Հիշեցնենք, նրա խափանման միջոցը` կալանքը, փոխելու համար անձնական միջնորդություն էին ներկայացրել «Ծառուկյան» խմբակցության պատգամավորներ Նաիրա Զոհրաբյանը եւ Սերգեյ Բագրատյանը:
Ըստ վճռի, ամբաստանյալը դատավարական պատշաճ վարքագիծ չի ապահովի ազատության մեջ, այսինքն, կխոչընդոտի գործի քննությանը`դատարան չներկայանալով, ինչը չեն կարող ապահովել ԱԺ պատգամավորները:
Ըստ վճռի, Գագիկ Եղիազարյանի պարագայում չկա նաեւ առողջական խնդիր կամ ընտանիքի անդամների հետ կապված հանգամանքներ, որոնք հնարավորություն տան խափանման միջոցը փոխելու:
Նելլի ԳՐԻԳՈՐՅԱՆ
