Այսօր Ադրբեջանից բռնագաղթված փախստականները ՄԱԿ-ի հայաստանյան ներկայացուցչության առաջ բողոքի ցույց արեցին: Նրանց խոսքով, նախկին կառավարությունից 30 տարի անտեսված լինելով, եկել են ՄԱԿ-ի միջոցով իրենց խնդիրները բարձրացնելու նոր կառավարության առաջ: Ասում են՝ ոչ գիտեն փախստական են, ոչ գիտեն՝ ՀՀ քաղաքացի են, երկու դեպքում էլ՝ անտեսված են: Արդեն մի քանի տասնյակ տարիներ է այս մարդիկ, որոնք գաղթել են Սումգայիթից, Բաքվից, Կիրովաբադից եւ Ադրբեջանի այլ բնակավայրերից, ապրում են 16-20 քառակուսու մեջ. նույն տեղում ուտում են, նույն տեղում քնում, զուգարան բաղնիքն էլ նաեւ խոհանոց է ծառայում:
«Էլ չենք դիմանում, այդ պայմաններով ապրելն անհնար է, ընտանիքները աճել են, տղաներ, թոռներ ունենք, այսպիսի անմարդկային պայմաններում ապրելն այլեւս մեր ուժերից վեր է»,-Aravot.am-ի հետ զրույցում իրենց բողոքն այսպես ներկայացրին փախստականները:
Նրանք եկել էին հանրապետության տարբեր քաղաքներից: Ինչպես որ 30 տարի առաջ նրանց հատկացվել են հանրակացարանային սենյակներ, այդպես էլ մինչ օրս այդ սենյակներում են ապրում:
Ցույցի մասնակիցները մեզ հետ զրույցում պատմեցին, որ իրար հետեւից հանրակացարանները սեփականաշնորհվում են. Ճիշտ է սեփականատերերը պետության հետ պայմանագիր են կապել, փախստականներին հանելու դեպքում պարտավոր են փոխհատուցել, բայց տեղից չեն շարժվում, սպասում են հերթով մահանան:
«Ասում են՝ ինչքան ուզում եք մնացեք, ձեզ ոչ ոք չի հանում, որ կամաց-կամաց մեռնենք մեզնից պրծնեն: Արդեն կեսը մահացել են, մնացածը ծերեր են, մի քանի ջահել է մնացել»,-մեզ հետ զրույցում ասաց Ստելա Դադամյանը:
«Նաիրի» հյուրանոցում ապրող փախստականների խոսքերով, եթե հանրակացարանների սենյակները կառավարությունը սկսել է սեփականաշնորհել այդտեղ ապրող փախստականներին, ապա իրենց պարագայում դա էլ հնարավոր չէ, հյուրանոցի սենյակները ոչ ոք իրենց չի տա, ոչ էլ բնակարան կամ գումար հատկացնելու մասին է խոսք գնում: Ուր դիմել են՝ մերժումներ են ստացել՝ գումար չկա: Նրանց նամակները կարուսելի պես մի գերատեսչությունից մյուսն են պտտվել, վերջում հանգրվանել են Միգրացիոն ծառայությունում:
«Մենք ոչխարներ չենք, մարդիկ ենք, որոնք նույնպես ուզում են ապրել»,-ասում է Սվետլանա Նալբանդյանը, որը Կիրովաբադում երկու հարկանի տուն է թողել, այժմ երեխաներով, թոռներով մի քանի քմ բնակարանում է ապրում:
Փախստականները դիմել են վարչապետ Նիկոլ Փաշինյանին, ՀՀ նախագահ Արմեն Սարգսյանին, պատգամավորներին, Մարդու իրավունքների գրասենյակին:
Այսօր նրանք ՄԱԿ-ի գրասենյակից երթով շարժվեցին դեպի կառավարություն՝ հանդիպելու փոխվարչապետ Արարատ Միրզոյանին: Նրանց բողոքը լսելու դուրս եկավ պարոն Միրզոյանի օգնականը: Ասաց, որ խնդիրը կուսումնասիրեն ու կպատասխանեն:
Լուսինե ԲՈՒԴԱՂՅԱՆ
