Այսօր ԱԺ նիստում քվեարկության դրվեց եւ 79 կողմ, 2 դեմ, 7 ձեռնպահ ձայներով ընդունվեց Կուտակային կենսաթոշակների մասին օրենքում լրացումներ կատարելու մասին նախագիծը՝ առաջին ընթերցմամբ:
«Ծառուկյան» խմբակցության պատգամավոր Նաիրա Զոհրաբյանը մինչ քվեարկությունը ասաց, որ ԲՀԿ-ն, «Ծառուկյան» դաշինքը մշտապես դեմ են եղել կուտակայինի պարտադիր բաղադրիչի ներդրմանը. «Այսօր եւս մեր սկզբունքային դիրքորոշումը մենք չենք փոխել: Այդուհանդերձ, ներկայացված նախագիծը որոշակիորեն մեղմում է ֆինանսական բեռը այն երիտասարդների, ովքեր իրենց ամսական աշխատավարձից վճարահանում են անում կուտակային ֆոնդին: Քննարկելով մեր գործընկերների հետ՝ մենք կքվեարկենք կողմ՝ պայմանով, որ կառավարության հետ շարունակելու ենք մեր քննարկումները՝ կուտակային պարտադիր բաղադրիչն ընդհանրապես հանելու համար»:
ՀՅԴ խմբակցության ղեկավար Արմեն Ռուստամյանն ասաց, որ իրենց սկզբունքային դիրքորոշումը հայտնել են եւ որոշել ձեռնպահ քվեարկել, որովհետեւ այս նախագիծը նախկինի հետ համեմատած բարելավված է, բայց այն չի լուծում կարեւորագույն հարցը՝ պարտադիր բաղադրիչի վերացման, որի դեմ իրենք պայքարել են: Ըստ Ռուստամյանի, պարտադիրի բաղադրիչը խաթարում է սերունդների համերաշխության սկզբունքը, անձի սեփականության իրավունքը, ստիպում է, որ մարդն այսօրվա հացի խնդիրը չլուծելով՝ գումար հետ գցի վաղվա համար:
«Ելքի» պատգամավոր Էդմոն Մարուքյանն էլ հիշեցրեց, որ երեկ արդեն դիրքորոշում հայտնել է, հիմա կողմ կլինեն, քննարկումները կշարունակեն. «Կա բարելավում, մենք նույնպես կողմ ենք քվեարկելու»:
Հռիփսիմե ՋԵԲԵՋՅԱՆ
