«Մանվել Գրիգորյանը եղել է առաջիններից մեկը, որն անվերապահ հեղինակություն է եղել Վազգեն Սարգսյանի համար»,- «Հայելի» ակումբում լրագրողների հետ հանդիպմանը հայտարարեց Արցախյան ազատամարտի մասնակից Վոլոդյա Հովհաննիսյանը:
Նա վստահեցրեց, եթե ինչ-որ մեկը կասի հակառակը՝ ինքը տասնյակ օրինակներ կբերի: Նա հավելեց, որ Վազգեն Սարգսյանի համար Մանվել Գրիգորյանը հրամանատարներ Ղևոնդ Հովհաննիսյանի, Սիսիանի Վովա Ազոյանի հետ եղել է հենարան:
ԱԱԾ նախկին պետի տեղակալ Գուրգեն Եղիազարյանն էլ մի դրվագ հիշեց. «Առաջին անգամ մարդիկ գրեցին, ասացին, որ սենց չի լինի, պատերազմի հերոսը սեփականաշնորհում է մեր հողերը, մի հատ էլ ռեստորան է վերցրել, Վազգեն Սարգսյանն էլ պատասխանեց՝ թող մի շուկա էլ ավել ունենա: Երբ դուք տանը քնած էիք, նա պատերազմի դաշտում էր: Այս խորագրի տակ երկրապահը բաժանվեց, ջարդվեց երկու հատվածի. տասը տոկոսանոց միլիարդատերերի և իննսուն տոկոսանոց չքավորների, որոնք ոչ միայն օրվա հացի փող չունեն մինչև այսօր էլ, այլև դեղորայքի հնարավորություն էլ չունեն»:
Պարոն Եղիազարյանը պնդեց՝ Մանվել Գրիգորյանին այդ աստիճանի բարձրացրել է Վազգեն Սարգսյանը: Վոլոդյա Հովհաննիսյանն արձագանքեց՝ Լևոն Տեր-Պետրոսյանի ներկայացմամբ և հավելեց. «1990-ականներին, երբ Կապանի 14-րդ բրիգադի հրամանատարությունն էին վստահել, իրեն դրա համար ասել են Լևոն Տեր-Պետրոսյանն ու Վազգեն Սարգսյանը»:
Պարոն Եղիազարյանն արձագանքեց. «Լևոն Տեր-Պետրոսյանը Մանվել Գրիգորյանի հետ մտերիմ չի եղել»:
Տաթև ՀԱՐՈՒԹՅՈՒՆՅԱՆ
