2001-2002թթ. Լինսի հիմնադրամի միջոցներով կառուցվեց Ոսկեպար-Կիրանց շրջանցիկ, շուրջ 11 կմ երկարությամբ ճանապարհը: Oգտագործման ռեսուրսը սպառած շրջանցիկ այդ ուղին շարքից դուրս է եկել, ճանապարհի ծածկը շատ տեղերում նստել է, բազմաթիվ խոր փոսեր կան:
Մայիսի 7-ից ընթանում են Ոսկեպար-Կիրանց շրջանցիկ ավտոճանապարհի հիմնանորոգման աշխատանքներ: «Վառմաշ» ՍՊԸ-ն հիմնանորոգում է 3 հատվածով, 18.7 կմ ընդհանուր երկարությամբ ճանապարհ: Առաջին հատվածը Իջեւանի տարածաշրջանի Բերքաբեր գյուղի խաչմերուկից ձգվում է մինչեւ Աճարկուտ գյուղի խաչմերուկ, 2-ր հատվածը՝ Կիրանցից մինչեւ Ոսկեպարի դպրոցի վերեւի տարածք, 3-րդ հատվածը՝ Ջուջեւան գյուղից մինչեւ Նոյեմբերյան քաղաք: Ընդհանուր առմամբ, նախատեսվում է կատարել 2 միլիարդ 200 միլիոն դրամի աշխատանքներ: Կատարվում են ճանապարհի մաքրում, լայնացում, առուների եւ կողնակների մաքրում, ճանապարհի ասֆալտապատում:
Նոյեմբերյանի տարածաշրջանի բազմաթիվ վարորդներ մեզ հայտնել են, որ հարկ չկա սահմանագոտին շրջանցող, 11 կմ երկարությամբ լեռանային ճանապարհը հիմնանորոգել, պետք էր հին, խորհրդային տարիներին գործող ճանապարհից փոքր-ինչ վերեւ գտնվող հատվածում շուրջ 4 կմ ճանապարհ կառուցել: Այն երկու կողմից ծածկված կլիներ հողապատնեշով եւ լիովին ապահով կլիներ ադրբեջանական հենակետերի գնդակոծությունից:
Ոսկեպար-Կիրանց շրջանցիկ ավտոճանապարհը ավելի քան կրկնակի անգամ երկար է խորհրդային տարիների ավտոճանապարհից, շրջանցիկ ուղին լիովին տեսանելի է Օդնդաղ սարի գագաթին գտնվող ադրբեջանական հենակետերից:
2015թ. սեպտեմբերի 24-ին ադրբեջանական զինուժը ռմբակոծեց Նոյեմբերյանի տարածաշրջանի Բերդավան գյուղը, բերդավանցի 2 կին զոհվեց: Այդ երեկո ադրբեջանական զինուժը Օնդաղի գագաթից հզոր լուսարձակներով լուսավորելով `Ոսկեպար-Կիրանց ավտոճանապարհը` այն գնդակոծեց: Բարեբախտաբար, տուժածներ չեղան:
Սահմանագոտու բնակիչները նշում են, որ Կիրանց-Ոսկեպար շրջանցիկ ճանապարհի 8 կմ հատվածը հիմնանորոգելու գումարով հարկ է անվտանգ, շուրջ 4 կմ երկարությամբ հիմնական ճանապարհ կառուցել: Ձմռան ամիսներին խոշոր բեռնատարները չեն կարողանում հաղթահարել բազմաթիվ ոլորաններով, լեռնային տեղանքով շրջանցիկ ավտոճանապարհը, այդ պատճառով խցանումներ են առաջանում:
2014-2015թթ. շուրջ 600 միլիոն դրամով կառուցվեց Վազաշեն-Պառավաքար շրջանցիկ ավտոճանապարհը, սակայն բազում կտրուկ ոլորաններով, երթեւեկի համար անհարմար այդ ճանապարհից Բերդի տարածաշրջանի վարորդները ներկայումս գրեթե չեն օգտվում, նրանք երթեւեկում են սահմանի եզրին գտնվող հիմնական ճանապարհով: Շրջանցիկ ճանապարհ կառուցելու փոխարեն հարկ էր սահմանագոտով ձգվող հիմնական ճանապարհի առավել վտանգավոր հատվածում հենապատ կառուցել`ապահովելով անվտանգությունը: Տավուշի սահմանագոտում ճանապարհներ կառուցելուց կամ հիմնանորոգելուց առաջ բնակչության կարծիքը հաշվի չեն առնում:
Ոսկան ՍԱՐԳՍՅԱՆ
