Մանվել Գրիգորյանի անվան հետ կապված սկանդալային բացահայտումները ցնցել են նաեւ ամբողջ աշխարհում ապրող հայությանը:
Հայֆայի եւ Իսրայելի հյուսիսային շրջանների հոգեւոր հովիվ Տեր Տիրայր քահանա Հովակիմյանն այսօր Aravot.am-ի հետ հեռախոսազրույցում ասաց. «Ցնցված եմ ԱԱԾ-ի արած բացահայտումներից: Թերեւս, ամենից շատ հուզված եմ աշակերտների՝ հասցեատեր զինվորին ուղարկած նամակների տեղ չհասնելով: Նրանք երկու տարի խաբված են եղել:
Ես ինքս էջմիածնեցի եմ: 14 տարեկանում եմ դուրս եկել իմ հարազատ քաղաքից, սակայն կապս երբեք չեմ խզել: Ամեն տարի ընտանիքիս հետ գալիս եմ Հայաստան՝ Էջմիածնի մեր տուն: Բայց միշտ տեսել եմ, որ էջմիածինցիների աչքերում ժպիտ չկա, երջանկություն չկա: Իսրայելից միշտ հետեւում եմ Հայաստանում կատարվող իրադարձություններին: Ապրիլյան թավշյա հեղափոխության օրերին, երբ դեռ Նիկոլ Փաշինյանը վարչապետ չէր, ես եկա Երեւան՝ հանդիպելու նրան: Ուզում էի համբուրել այն մարդու ճակատը, որը մտադիր է Հայաստանն ազատագրել լճացումից: Նրան հանդիպեցի, նրա հետ քայլեցինք եւ ցանկությունս ի կատար ածեցի:
Այսօր էլ հետեւում էի Ազգային ժողովի արտահերթ նիստին: Բավարարված եմ պատգամավորների որոշումով: Էջմիածինը ազատագրվեց բռնապետությունից», – ասաց հոգեւորականը:
Աշոտ ՀԱԿՈԲՅԱՆ
