«Պարզաբանեմ, թե ինչու է Կառավարությունն այդ որոշումը կայացրել՝ կուտակային կենսաթոշակների առնչությամբ: Մենք ժառանգել ենք իրավիճակ, երբ հուլիսի մեկից ուժի մեջ էր մտնում այդ օրենքը: Մենք քիչ ժամանակ ունեինք որեւէ բան անելու համար: Մեր լուծումը ոչ թե մեր ընդհանուր մոտեցումն է, այլ արտահայտում է նպատակ՝ խնդիրը բոլոր շահագրգիռ կողմերի ներգրավվածությամբ պետք է քննարկվի»,-«Սինոփսիս Արմենիա» ընկերություն այցի ժամանակ այսօր անդրադառնալով փաստին, որ հուլիսի մեկից ուժի մեջ է մտնում կուտակային կենսաթոշակային համակարգը՝ պարտադիրի բաղադրիչով, հայտարարեց ՀՀ վարչապետ Նիկոլ Փաշինյանը;
«Կան նախարարներ, որոնք պնդում են, որ այդ համակարգը սահմանադրականության հետ կապված խնդիր ունի, բայց մենք այսպես ժամանակ ենք խնայում, որպեսզի հանդարտ կերպով խնդիրը քննարկենք եւ հասնենք համաձայնեցված որոշումների»,-պարզաբանեց Նիկոլ Փաշինյանը:
Նա նշեց, որ նոր կառավարությունը չգնաց օրենքը հետաձգելու ճանապարհով, քանի որ «Իմ քայլը» շարժման սկզբունքներից մեկը՝ համերաշխությունը, կարող էր խախտվել. «Այն 207 հազար մարդիկ, որոնք ինչ-ինչ պատճառներով արդեն կուտակայինի համակարգի մեջ էին, ստացվում է, որ նրանց պետք է ասեինք՝ մենք ձեզ ոչնչով չենք կարող օգնել: Այդպես կխախտեինք նրանց հանդեպ համերաշխության սկզբունքը»:
Լուիզա ՍՈՒՔԻԱՍՅԱՆ
