«Քառօրյա պատերազմի մասնակիցների միավորում» նախաձեռնության հեղինակ, դիրքապահ, «Քառօրյա պատերազմի մասնակիցների միավորում» ՀԿ ղեկավար Մանուել Մանուկյանը «Տեսակետ» ակումբում հայտարարեց, թե Հադրութում մեծ աղմուկ է բարձրացրել այն, որ ԵԿՄ նախագահ Մանվել Գրիգորյանը զինվոր է ծեծել:
Aravot.am-ը հետաքրքրվեց՝ մանրամասներ կներկայացնի՞, Մանուելը պատասխանեց. «Մանվել Գրիգորյանը Հադրութում մեր զորամասի առաջ զինվորների էր ծեծել, ինչը մեծ աղմուկ էր բարձրացրել: Ես նրան երբևէ չեմ տեսել, երբևէ իր հետ չէի շփվել, զարմացած էի: Հիշում եմ, որ ասում էին, թե զինվորները ճանապարհին կանգնած են եղել, ինքն անցնելուց է եղել, ճանապարհը նեղ է եղել, իջել է, և զինվորների հետ բախում եղել: Փոխանակ հարցներ՝ ո՞նց եք, ինչո՞վ օգնեմ, բախում է եղել»:
Կարող եմ ասել, որ զինվորների մեջ նրա նկատմամբ վախ կար: Ես երբեք ոչ մեկից վախ չեմ ունեցել, բայց հիշում եմ, երբ Մանվել Գրիգորյան էին ասում, մարդիկ այլ մթնոլորտում էին հայտնվում: Պատմում էին, որ եթե Էջմիածնում մեկը սրճարանում նստած էր լինում, եթե Մանվել Գրիգորյանը մոտենում էր, նա պետք է տեղը զիջեր»:
Մեր հարցին՝ կո՞ղմ է, որ Մանվել Գրիգորյանին զրկեն Ազգային հերոսի կոչումից՝ հատկապես հաշվի առնելով նաև ԱԱԾ բացահայտումները այն մասին, որ նա զինվորի բաժինն իր վագրերին ու արջերին է տվել, Մանուելը պատասխանեց. «Միանշանակ: Չեն կարող Մանվել Գրիգորյանը և մյուս հերոսները նույն հարթության վրա լինել»:
Տաթև ՀԱՐՈՒԹՅՈՒՆՅԱՆ
