Քրեակատարողական ծառայության պետի առաջին տեղակալ, համակարգի երկարամյա ծառայող Արսեն Աֆրիկյանը ազատվել է աշխատանքից: Այս մասին տեղեկացանք ՀՀ արդարադատության նախարարության քրեակատարողական ծառայության կայքէջից:
Հիշեցնենք, որ հունիսի 11-ին վարչապետի որոշմամբ ՔԿՀ ծառայության նախկին պետ Ռաֆայել Հովհաննիսյանին փոխարինել է «Արթիկ» ՔԿՀ-ի պետ Արտյոմ Մխոյանը: Վերջինս ունի նոր տեղակալներ։
Արդարադատության նախարարի հրամանով` «Հրազդան» ՔԿՀ-ի պետ, գնդապետ Մանուկ Միքայելյանը նշանակվել է ՔԿՀ ծառայության պետի առաջին տեղակալ։
Տեղակալներ են նշանակվել ՔԿՀ ծառայության կազմ-վերլուծական եւ միջազգային համագործակցության բաժնի պետ, գնդապետ Հայկ Քոչինյանը, ՔԿՀ ծառայության պահպանության ապահովման բաժնի պետ, գնդապետ Վարդգես Ծաղիկյանը։
Միակ հնաբնակը գնդապետ Վարուժան Մելքոնյանն է, որը 2009թ-ից ՔԿՀ ծառայության պետի տեղակալն է եւ վերանշանակվել է նույն պաշտոնում։
Ըստ պաշտոնական հաղորդագրության՝ հունիսի 18-ին ՀՀ ԱՆ քրեակատարողական ծառայության պետ, արդարադատության գնդապետ Արտյոմ Մխոյանը ծառայության ստորաբաժանումների և քրեակատարողական հիմնարկների պետերին ներկայացրել է ՀՀ արդարադատության նախարար Արտակ Զեյնալյանի՝ հունիսի 15-ի հրամանով նշանակված ծառայության պետի տեղակալներին՝ շնորհակալություն հայտնելով ծառայության պետի նախկին տեղակալներին իրենց աշխատանքի և նվիրվածության համար. «Հանդիպման ընթացքում Արտյոմ Մխոյանն անդրադարձավ ծառայությանը վերաբերող կարևորագույն հարցերին և գործառույթներին, մասնավորապես շեշտադրեց կոռուպցիայի դեմ պայքարի հիմնախնդիրները»:
Դավիթ ԱՐՄԵՆՅԱՆ
