Այսօր կայացած մամուլի ասուլիսում Հայաստանի ծանրամարտի ֆեդերացիայի գլխավոր քարտուղար եւ տղամարդկանց ազգային հավաքականի գլխավոր մարզիչ Փաշիկ Ալավերդյանը հայտարարել է, որ միջազգային ֆեդերացիայի 18 պահանջներից 12-ը կատարվել է, իսկ մնացածը կատարման փուլում են: Վճարվել է նաեւ $ 50 հազար տուգանքը, եւ մեր ֆեդերացիան IWF-ի որոշմամբ վերադառնում է միջազգային ասպարեզ:
Մասնագետը տեղեկացրել է, թե ֆեդերացիայի գործունեությունը մեկ տարով կասեցնելը չի անդրադարձել մեր մարզիկների վրա, եւ ինքը մտադիր է նոյեմբերին կայանալիք աշխարհի առաջնությունում (այն կանցկացվի 10 քաշային կարգում, 7-ը՝ օլիմպիական) եւ օլիմպիական խաղերում ապացուցել, թե որքան ուժեղ է հայկական ծանրամարտը, չնայած իրենց քննադատում են:
«Մինչեւ աշխարհի առաջնությունը մեր ծանրորդները պայքարելու են Պատանեկան օլիմպիական խաղերի երկրորդ ուղեգրի համար (տղաներն արդեն մեկը ունեն), մասնակցելու են մինչեւ 15 տարեկանների եւ 15-ից բարձր, մինչեւ 20 եւ 23 տարեկանների Եվրոպայի առաջնություններին», – ասաց պարոն Ալավերդյանը:
Աշոտ ՀԱԿՈԲՅԱՆ
