«Նպաստ պետք չի, ոչ մեկը ողորմություն չի խնդրում». Արամ Սաթյանը վիրավորվեց Նաիրա Զոհրաբյանի խոսքից՝ իրենց նպաստ տալու մասին. (Տեսանյութ)

«Հայաստանը միակ երկիրն է, որտեղ ստեղծագործող նկարչի արվեստանոցի գույքահարկը հավասարեցված է կազինոյի գույքահարկին», – այսօր մշակութային քաղաքականության վերաբերյալ ԱԺ լսումների ժամանակ բողոքեց Նկարիչների միության նախագահ Կարեն Աղամյանը:

Եվրոինտեգրման հարցերի հանձնաժողովի նախագահ Նաիրա Զոհրաբյանը խոստացավ, որ գույքահարկի մասին իրենք նոր օրենսդրական նախաձեռնությամբ հանդես կգան. «Տվեք 1 շաբաթ ժամանակ»:

Կոմպոզիտորների միության անդամ Արամ Սաթյանն ասաց, որ ֆինանսներ չկան, արվեստագետները վատ սոցիալական վիճակի մեջ են, միության անդամների ամսական վճարը 48 հազար դրամ է. «Այդ բյուջեով պետք է պահել ամբողջ կազմը, կոմպոզիտորներին, սոցիալական օգնություն անել եւ խրախուսել ստեղծագործությունները»:

Նա հորդորեց ուշադրություն դարձնել ստեղծագործական միություններին. «Նրանք են պահում այսօր պրոֆեսիոնալ արվեստը»: Նա հարցրեց, թե «Ստեղծագործ Եվրոպա» ծրագրով հատկացվելիք 1 մլրդ 460 մլն եվրոյից որքա՞ն գումար կհասնի պրոֆեսիոնալներին: Նաիրա Զոհրաբյանը պատասխանեց, որ դա ամբողջ ծրագրի գումարն է, Հայաստանը վավերացնելով այն, կարող է դառնալ այդ ծրագրի շահառուներից մեկը:

Նաիրա Զոհրաբյանն ասաց, որ միայն ստեղծագործական միությունները չեն սոցիալապես վատ վիճակում, մեր ամբողջ երկրում կան աշխատող աղքատներ: Նա քննադատեց, որ շատ դեպքերում ստեղծագործական միությունները սոցիալապես անապահով բանաստեղծների միջակ գործերը պետության հաշվին տպում են, ինչն անընդունելի է. «Ես գնացել եմ գրախանութների էն պադվալները եւ տեսել եմ պետպատվերով տպագրված գրականություն, որոնք գալչկայի համար են արվել, որ հրատարակչությունը գումար ստանա: Մտահոգությունը հասկանալի է, բայց եթե դուք հիմա մտածում եք, որ մենք պիտի գումար բերենք ու նպաստ տանք ստեղծագործական միություններին…»:

Սաթյանը վիրավորվեց՝ միջամտելով. «Նպաստ պետք չի, աշխատանքի դիմաց: Ոչ մեկը ողորմություն չի խնդրում, այստեղ հպարտ մարդիկ են նստած: Ոչ մեկն իրավունք չունի ասելու, որ արվեստագետը պետք է խնդրի, թող կառավարությունը խնդրի, 25 տարվա պետություն է հաղթանակած, մի հատ պատվեր չկա ստեղծագործության, որը նվիրված է այս 25 տարվան, ո՛չ օպերա, ո՛չ բալետ, ո՛չ սիմֆոնիա»:

Նաիրա Զոհրաբյանն էլ ասաց, որ լսումներին մշակույթի փոխնախարարներն են ու նրանք թող պատասխանեն, թե ինչ են եղել այն գումարների հետ, որոնք տարիներ շարունակ տրամադրվել են բալետ, օպերա, ներկայացումներ բեմադրելու համար եւ ինչու շատ դեպքերում դրանց որակը եղել է այնպիսին, որ ավելի լավ էր չլիներ:

Հռիփսիմե ՋԵԲԵՋՅԱՆ