Այսօր Գյումրու ավագանու նիստում քննարկվեց նաև Սերժ Սարգսյանի եղբորը՝ «Փյունիկ» հիմնադրամի հոգաբարձուների խորհրդի նախագահ Լևոն Սարգսյանին Գյումրու պատվավոր քաղաքացու կոչումից զրկելու նախագիծը։ «ԳԱԼԱ» խմբակցությունից այն ներկայացրեց Արմենուհի Վարդանյանը։ Նա հիշեցրեց, որ երկրորդ անգամն է ամբիոնին մոտենում այս նույն թեմայով․ 2016 թվականին «ԳԱԼԱ»-ի նախաձեռնող խումբը ստորագրություններ էր հավաքել, որով գյումրեցիները նշում էին, թե Լևոն Ազատի Սարգսյանը չունի բավարար արժանիքներ Գյումրու պատվավոր քաղաքացու կոչմանն արժանանալու համար։
Արմենուհի Վարդանյանը նշեց՝ դեռ այն ժամանակ էլ իրենց հիմնավորումն այն էր, որ «Փյունիկ» հիմնադրամը, որը Գյումրիում աջակցում էր «Վերածնունդ» միջազգային փառատոնի իրականացմանը, իրականում ոչ թե բարեգործություն էր անում քաղաքի համար, այլ գումարներ հավաքում մասնակիցներից։ Արմենուհի Վարդանյանի տվյալներով, յուրաքանչյուր մասնակից գումար է վճարում փառատոնին մասնակցելու համար, Արցախից, Հայաստանից մասնակցողները 3-6 հազար դրամ, երգչախմբերը՝ 20 հազար դրամ, արտերկրյա մասնակիցները՝ 80-100 եվրո։
«Որտե՞ղ է այստեղ Լևոն Սարգսյանի բարեգործությունն, անհասկանալի է, «Փյունիկ» հիմնադրամն իր գործունեությամբ մշտապես է կասկածներ հարուցել, ներկայումս ևս խոսվում է այն մասին, որ հիմնադրամին ֆինանսավորում են Երևանի քաղաքապետարանը, Երևան քաղաքապետ Տարոն Մարգարյանը, «Երևան» հիմնադրամը, որի գործունեությունն այժմ գտնվում է ԱԱԾ ուշադրության կենտրոնում», -ասաց Արմենուհի Վարդանյանը։
Նա նշեց, որ այս անձին պատվավոր քաղաքացու կոչում է տրվել քաղաքական նպատակներով, հարցը 2016 թվականին օրակարգ մտցվեց ՏԻՄ ընտրություններից առաջ և նրան պատվավոր քաղաքացի շնորհեցին զուտ այն պատճառով, որ Սերժ Սարգսյանի եղբայրն է։
Հետաքրքիրն այն է , որ այսօր նրան այդ կոչումից զրկելու համար առաջինը կողմ քվեարկեցին այն ավագանու անդամները, որոնք ժամանակին թունդ «պատերազմի» մեջ էին մտել «ԳԱԼԱ»-ի նախաձեռնող խմբի անդամների հետ։
16 կողմ ձայնով նա զրկվեց Գյումրու պատվավոր քաղաքացի լինելուց, դեմ էր ընդամենը մեկ հոգի։
Նունե ԱՐԵՎՇԱՏՅԱՆ
