Fitch միջազգային վարկանիշային գործակալությունը Հայաստանի երկարաժամկետ վարկանիշը արտարժույթի և տեղական արժույթի համար հաստատել է «B+» մակարդակում՝ դրական կանխատեսմամբ: Այս մասին ասվում է գործակալության տարածած հաղորդագրության մեջ:
Գործակալության մասնագետները կարծում են, որ Հայաստանի տնտեսությունը կանխատեսվածից շատ ավելի արագ է վերականգնվում և ակնկալվում է, որ այն առավել բարձր աճ կգրանցի՝ 2017թ. 7.5% աճից հետո 2018թ. արձանագրելով 4.7%, իսկ 2019թ. 4.0% աճ:
Դրական կանխատեսումն արտացոլում է Հայաստանի աճի հեռանկարը, ֆինանսական խոշորացման գործընթացի սկիզբը, որը, մասնագետներն ակնկալում են, միջնաժամկետ հեռանկարում կհանգեցնի պետական պարտքի աստիճանական նվազման:
Մասնագետները նաև դրական են գնահատում այն, որ Հայաստանի մակրոտնտեսական և ֆինանսական կայունությունը պահպանվել է՝ չնայած ապրիլյան քաղաքական ճգնաժամին, և դա արտացոլում է դրամավարկային քաղաքականության արժանահավատությունը՝ դիմակայելու տնտեսական և քաղաքական ցնցումներին:
Պատրաստեց՝ Վիկտորյա ԱՆԴՐԵԱՍՅԱՆԸ
