Գյումրու ավագանու այսօրվա նիստին «ԳԱԼԱ» խմբակցության կողմից ներկայացրած նախագծերից մեկը ՀՀ երկրորդ նախագահ Ռոբերտ Քոչարյանին Գյումրու պատվավոր քաղաքացու կոչումից զրկելու մասին էր։
Հարցը «ԳԱԼԱ» խմբակցությունից ներկայացրեց Արման Գրիգորյանը։ Նա խոսեց այն մասին, թե Ռոբերտ Քոչարյանի ու Սերժ Սարգսյանի կառավարումը ինչ կործանարար դերակատարություն է ունեցել մեր երկրի համար։ ԲՀԿ խմբակցության ավագանու անդամներից մեկն ընդհատեց՝ նշելով, թե կոնկրետ այս հարցից խոսեք։ Սամվել Բալասանյանը իր հերթին սաստեց նրան՝ ասելով․ «Տեղից չխոսեք, եթե հարց ունենք, հետո կտաք, եթե հայտարարություն ունեք, կասեք»։ Արման Գրիգորյանը խոսեց սոցիալական ծանր վիճակից, 400 հազար արտագաղթած մարդկանցից, Հոկտեմբերի 27-ի ու մարտի մեկի ոճրագործություններից։
Նա նշեց, որ Գյումրու նախկին ու ներկա իշխանությունների թեթև ձեռքով, իրենց կուտակած հարստությունը պահպանելու ու երկրի վերնախավին հաճոյանալու համար այս մարդկանց Գյումրու պատվավոր քաղաքացու կոչում են տվել։
«Անտեսել են, արհամարհել և ցածրացրել են գյումրեցիների, և հատկապես այն մարդկանց բարի համբավը՝ Վիկտոր Համբարձումյան, Շառլ Ազնավուր, Փելեշյան, նույն նժարի վրա դնելով որոշ անարժանների»,- ասաց Արման Գրիգորյանը։
Նա ասաց, որ այլևս երբեք Գյումրու պատվավոր քաղաքացու ցուցակում ժողովրդի կողմից չեն հանդուրժվի բարոյազուրկ անձանց անունները։
«Հարգելիներս, բոլորն անխտիր պետք է հասկանան, որ օր առաջ պետք է զրկել այս անձանց Գյումրու պատվավոր քաղաքացու կոչումից՝ հանուն մեր արժանապատվության, հանուն մեր խղճի հանգստության, հանուն մեր թասիբի և հանուն մեր գյումրեցիների ճշմարտության հաղթանակի»,- ասաց բանախոսը։
17 կողմ ձայնով Գյումրու ավագանին զրկեց Ռոբերտ Քոչարյանին պատվավոր քաղաքացու կոչումից։
Նունե ԱՐԵՎՇԱՏՅԱՆ
