Այսօր առավոտից կառավարության շենքի առաջ բողոքի ցույց են անում մարզերի մի խումբ բնակիչներ, գյուղացիներ, որոնք զբաղվում են կաթի արտադրությամբ: Նրանք ի նշան բողոքի կառավարություն են եկել մեծ բեռնատարներով եւ կաթի մթերման համար նախատեսված տարաներով:
Ցուցարարները պահանջում են կաթի մթերման գները արտադրողները վերանայեն, նշելով, որ իրենց չարչարանքի դիմաց կաթը կոպեկներով են հանձնում, ինչը որեւէ կերպ չի փոխհատուցում այն ծախսերը, որ կատարվել են:
Կաթի արտադրությամբ զբաղվող գյուղացիները մեզ հետ զրույցում նշեցին, որ մեծ մասը վարկերի տակ են, որոնք վերցրել են անասուն եւ անասնակեր գնելու նպատակով, քանի որ անասնակերի դեֆիցիտի պատճառով իրենք ստիպված են եղել մի քանի անգամ բարձր գնով անասնակեր գնել, մի մասն էլ կերի բացակայության պատճառով անասուններին մորթել է, վաճառել:
Առավոտյան նրանց բողոքը լսելու էր դուրս եկել փոխվարչապետ Տիգրան Ավինյանի օգնականը:
Ավելի ուշ նրանց լսեց նաեւ գյուղնախարարը:
Այս պահին պայմանավորվածություն է ձեռք բերվել կաթ արտադրողներից բաղկացած մի քանի հոգանոց խմբի հանդիպումը գյուղատնտեսության նախարարի հետ: Գյուղացիները կառավարության շենքի առջեւ սպասում են հանդիպումների արդյունքին:
Լուսինե ԲՈՒԴԱՂՅԱՆ
