Սեքսուալ բնույթի բռնի, անառակաբարո գործողություն արած, թմրամոլ տղաները բանակ չեն գնա. ՊՆ-ի նոր առաջարկը

Այսօր ԱԺ պաշտպանության հանձնաժողովի նիստում «Զինվորական ծառայության եւ զինծառայողի կարգավիճակի մասին» оրենքում փոփոխությունների նախագիծը քննարկվեց:

ՊՆ փոխնախարար Գաբրիել Բալայանն ասաց, որ նախագծով կանոնակարգում են, որ պարտադիր զինվորական ծառայության համար զորակոչման ենթակա չեն քրեական օրենսգրքի որոշ հոդվածներով դատապարտված եւ պատիժ կրած տղաները, մասնավորապես՝ սեքսուալ բնույթի բռնի գործողություններ կատարածները, անառակաբարո գործողություններ կատարածները, անդամախեղում իրականացրած ու դատապարտվածները, թմրանյութերի գործածման հակում ունեցողները եւ այլն:

ՀՀԿ պատգամավոր Տաճատ Վարդապետյանը հարցրեց՝ այդ հանցագործությունների համար կա նաեւ վարչական պատիժ, հնարավոր չէ՞, որ հանցագործություն անեն, տուգանք վճարեն ու ազատվեն նաեւ զինծառայությունից՝ Բալայանը պատասխանեց, որ զինդատախազությունը վերլուծություն է արել ու վստահեցրել, որ ավելի լավ է այդ անձինք, որոնք անառակաբարո գործողությունների եւ նշված հանցագործությունների համար դատապարտվել են, չգնան բանակ, որովհետեւ կարող են ավելի ծանր հետեւանքներ առաջացնել. «Սրանք բավական վարկաբեկիչ հոդվածներ են, մի քիչ իրավակիրառ առումով չեմ կարող պատկերացնել, թեկուզ եթե տուգանք է, հասարակական պարսավանքի արժանի հոդվածներ են՝ բավական վարկաբեկիչ: Պրակտիկայում չգիտեմ քանի հոգի են դատապարտվել այդ հոդվածներով՝ զորակոչային տարիքի երիտասարդների մեջ»:

Տաճատ Վարդապետյանն արձագանքեց, որ վարկաբեկիչը բանակից չարամտորեն խուսափելն է ու արդյոք սրանով չե՞ն տալիս նման հնարավորություն: Հանձնաժողովի նախագահ Կորյուն Նահապետյանը պահանջեց, որ հանձնաժողովին ներկայացնեն տեղեկատվություն այն մասին, թե զորակոչային տարիքի քանի՞ երիտասարդ կա ներկայումս այդ հոդվածներով դատապարտված:

Բալայանը պատասխանեց, որ այս առաջարկությունը հիմնված է խորը վերլուծության հիման վրա, այդ անձինք եթե զորակոչվեն բանակ, զորամասում նրանց գտնվելը ավելի մեծ վնաս է տալու, քան թե նրանց տիպի զինակոչիկ կորցնելը:

Հռիփսիմե ՋԵԲԵՋՅԱՆ